Eider
From Wikipedia
De Eider is de gröttste Stroom vun Sleswig-Holsteen. Se is 190 km lang. De eerste opschreven Naricht is vun Adam vun Bremen ut dat Johr 1076, de vun de Egdor schrifft un dat düsse Stroom twüschen de Dänen un de Sassen liggt. He schrifft ok, dat de Dithmarscher, de he Tedmarsgoi naamt, glieks an de Küst twüschen Eider un Elv seten un dat ehr Moderkark in Meldörp is. Ok dat glieks blangen de Eider en Bischop in Pahlen seet, wat dormals Palmis heet.
[Ännern] Verloop
De Eider kümmt ut den Bothkamper See un geiht denn na Noorden an Bordesholm un Flintbek vörbi bet na den Süüdwesten vun Kiel. Denn böögt se na Westen af un geiht dör den Westensee. Denn wedder na Noord dör den Flemhuder See in den Noord-Oostsee-Kanal un kümmt denn bi Rendsborg wedder rut. Denn maakt se vele Sliepen, geiht över Nübbel na Süüdwest, böögt denn wedder na Noorden un denn na Westen un geiht denn twüschen Pahlen un Erfde dör. Bi Friedrichstadt geiht de Treene in de Eider. Dor warrt de Eider denn ok to'n Tiedenstroom. Bi Tönning warrt se breed un kriggt so'n richtig Ästuar. Dat is denn vun dat Eider-Sparrwark afsparrt, wenn en Stormfloot kümmt.
