April
From Wikipedia
| Januar Februar März April Mai Juni |
| Juli August September Oktober November Dezember |
De April is in’n Gregoriaanschen Klenner de veerte Maand in dat Johr. De April hett 30 Daag un höört to dat Fröhjohr.
De Naam kummt vermotlich von dat latiensche Woort aperire, wat soveel heet as open gaan. Dat betütt sik denn woll dorop, dat in’n Fröhjohr de Knospen open gaat. En olen düütschen Naam för dissen Maand is ok Ostermaand – de weer dör Karl den Groten in’n 7. Johrhunnert inföhrt worrn – wieldat Oostern meistens in’n April liggt. Annere Naams, de hüüt aver kuum mehr bruukt warrt, sünd Wannelmaand oder Launing.
In’n röömschen Klenner weer de April de tweete Maand. De April fangt jümmer mit den lieken Wekendag an as de Juli, man in Schaltjohren fangt he mit den lieken Dag as de Januar an.
De Begreep Aprilwedder steiht för dat wesselhafte Wedder, dat faken in’n April vörkummt. Dat seggt man hüüt aber ok, wenn dat gor nich in’n April is.
An’n 1. April mutt man oppassen, as dat Bruukdom is, annere Lüüd „in’n April to schicken“. Dat heet nix anners, as dat een annere Lüüd bannig verschietern un anlegen deit. Den Aprilschaabernack gifft dat tominnst al siet dat 16. Johrhunnert.
Dat heet ok, dat de Dübel an en 1. April ut den Heven verdreven worrn is.
