ഹാം റേഡിയോ
വിക്കിപീഡിയ, ഒരു സ്വതന്ത്ര വിജ്ഞാനകോശം.
വയര്ലസ് സെറ്റുകള് ഉപയോഗിച്ച് തമ്മില് വാര്ത്താവിനിമയം നടത്തുന്ന ഉപാധിയാണ് ഹാം റേഡിയോ. രാജകീയ വിനോദമെന്നും ഹാം റേഡിയോ അറിയപ്പെടുന്നു. വിനോദമെന്നതിനുപരിയായി നിര്ണ്ണായകസമയങ്ങളില് ആശയവിനിമയം നടത്തുന്നതിനും ഹാമുകള് ഉപയോഗിക്കപ്പെടുന്നു.
സ്വന്തമായി ഉണ്ടാക്കിയ വയര്ലസ് സെറ്റുകളോ വിപണിയില് നിന്നും വാങ്ങുന്ന വയര്ലസ് സെറ്റുകളോ ഉപയോഗിക്കാം. മറ്റുഹോബികളെ അപേക്ഷിച്ച് പെട്ടന്ന് തുടങ്ങാന് സാധിക്കുന്ന ഹോബിയല്ല ഇതെന്നുമാത്രം. വയര്ലസ് സെറ്റുകള് ഉപയോഗിക്കുവാനായി സര്ക്കാരില് നിന്നും ലൈസന്സ് കരസ്ഥമാക്കണം. ഒരു ചെറിയ പരീക്ഷയും മോഴ്സ് കോഡ് ഉപയോഗിച്ച് കമ്പിയില്ലാ കമ്പി സന്ദേശം അയക്കുന്നതിനുള്ള പ്രായോഗിക പരീക്ഷയും കഴിഞ്ഞാല് ലൈസന്സ് ലഭിക്കും. മേശപ്പുറത്ത് പ്രവര്ത്തിക്കുന്ന ചെറിയ ഒരു റേഡിയോ സ്റ്റേഷന് തന്നെയാണ് വയര്ലസ് സെറ്റ് എന്നതുകൊണ്ട് അര്ഥമാക്കുന്നത്. എഫ്. എം, ഷോര്ട്ട് വേവ് എന്നീ വിഭാഗത്തിലാണ് മിക്കവാറും ഇവ പ്രവര്ത്തിക്കുന്നത്.
ഈ ഹോബിയിലേക്ക് ചേക്കേറാന് ആദ്യമായി ഇവരുടെ സന്ദേശങ്ങള് ശ്രവിച്ച് പരിചിതമാകണം. ഇതിനായി വിലയേറിയ ഉപകരണങ്ങള് ഒന്നും ആവശ്യമില്ല. സാധാരണ രണ്ടുബാന്ഡുള്ള റേഡിയോ മതി. അവയില് 40 മീറ്ററില് ട്യൂണ് ചെയ്താല് ചെറുതായി സംഭാഷണം കേള്ക്കാം. റേഡിയോയുടെ ഏരിയലില് അല്പം വയര്കൂടി വലിച്ചുകെട്ടിയാല് സംഭാഷണം വ്യക്തമായി കേള്ക്കുവാന് സാധിക്കും.
ഹാമുകള് സാധാരണയായി 40 മീറ്റര് ബാന്ഡ്, 20 മീറ്റര് ബാന്ഡ് എന്നീ ബാന്ഡുകളാണ് ഉപയോഗിക്കാറുള്ളത്. 144 മെഗാഹെര്ട്സും അതിനടുത്തുള്ള ഫ്രീക്വന്സികളും ഉപയോഗിച്ചാണ് എഫ്.എം ബാന്ഡില് ഹാമുകള് സംസാരിക്കുന്നത്. ഓരോ രാജ്യത്തും ഇത് വ്യത്യാസപ്പെടാം ( കൊടുത്തിട്ടുള്ള ഫ്രീക്വന്സിയും ബാന്ഡും മിക്കവാറും എല്ലാ രാജ്യങ്ങളും ഒരേപോലെയാണ് ഉപയോഗിക്കുന്നത് ).
ഇന്ത്യയില് 2004 ഡിസംബര് 25-നു ഉണ്ടായ സുനാമി ആക്രമണത്തില് ആന്ഡമാന് നിക്കോബര് ദ്വീപുകളില് നിന്നും ഹാം റേഡിയോ ഉപയോഗിച്ചായിരുന്നു വാര്ത്താവിനിമയം നടത്തിയത്. ഗുജറാത്ത് ഭൂചലനസമയത്തും ഹാം റേഡിയോ ആയിരുന്നു മുഖ്യമായും വാര്ത്താവിനിമയത്തിനായി ഉപയോഗിച്ചത്. ഇന്ത്യയില് ഇതുവരെ 20000 അധികം ഹാമുകള് ഉണ്ട്.