Вена

Од Википедија, слободна енциклопедија

Венскиот систем во човековото тело

Вените (латински Venae) се крвни садови кои ја враќаат крвта во срцето од сите делови на телото на животните. Во крвната мрежа, повеќето животни (вклучувајќи го и човекот) имаат повеќе венски отколку артериски садови. Кај човекот, на пример, просечно на една артерија доаѓаат два венски сада.

Вените се слично градени како и артериите, но постојат и некои разлики. Тие имаат поголем дијаметар и средниот мускулен слој е потенок, што го прави венскиот ѕид нееластичен. Затоа при повреда, венските ѕидови се слепуваат и крвта бавно истекува. Внатрешниот слој кај вените образува клапи (залистоци) кои ја движат крвта и спречуваат нејзино враќање назад. Значи, вените се изградени од три слоеви:

• Надворешен слој, кој се состои од колагенски и еластични влакна и надворешен еластичен лист
• Среден слој
• Внатрешен слој, во чиј состав влегуваат ендотелот и внатрешниот еластичен лист, од кој се образуваат залистоците.

Сите венски крвни садови, со исклучок на белодробните вени носат редуцирана крв од ткивата до срцето. Се формираат по принцип на собирање, така што на венските капилари се надоврзуваат венулите (најмалите венски садови). Венулите, пак, преминуваат во горна и долна шуплива вена, кои ја носат редуцираната крв до срцето.

При попуштање на мускулните ѕидови, вената се проширува со што доаѓа до појавата на попуштени вени. Ова нарушување е очигледно, бидејќи вените се сместени површински во телото, за разлика од артериите кои се сместени подлабоко.