Ruatāne
Nō Wikipedia Māori
Ko Ruatāne te tino rangatira o te iwi patupaiarehe, mai i Te Aroha, tae noa ki Moehau. E ai ki ngā kōrero o ngā rā o neherā, ka nohoia a Te Aroha maunga e te patupaiarehe, he tokomaha rawa ō rātou pā i ngā tihi maunga. Ka puta mai ngā patupaiarehe nei i te pō, i ngā rā kōnehunehu rānei. Nā, i tētahi rā, ka haere tētahi wahine Māori ki roto ki te ngāherehere, kimi ai i te hua tawa. Ka kimi, ka piki, ka kake. Haere tonu ā, piki tonu te wahine nei i roto i te ngāherehere. Ka piki, ka kake, ā, kāhore ia i te mōhio kua tae ia ki tētahi wāhi i rāhuitia rā e ngā patupaiarehe. Ka rangona e ia te kōauau e tangi mai ana. Nā Ruatāne taua waiata kohinu wahine. Ka kitea e Ruatāne te wahine nei i te wāhi tapu rā, ka mauria mai ki tōna kāinga, i te tihi tonu o te maunga. Ka moea tonutia, ā, ka puta mai ngā uri. Nā konei i kīa ai e ngā kaumātua, i heke iho ētahi o ngā tātai rangatira o Hauraki i te patupaiarehe.
