ანდრონიკაშვილი, ზაქარია
ვიკიპედიიდან
ზაქარია თამაზის ძე ანდრონიკაშვილი (* დაახლოებით 1740 ― † 1800), ქართლ-კახეთის სამეფოს პოლიტიკური და სამხედრო მოღვაწე.
სიმამაცის გამო ცნობილი იყო "მიწის მგლის" მეტსახელით. 1756 თავი გამოიჩინა ლეკებთან ბრძოლაში სოფ. კატალეთსა და სკრასთან. მეფის ასულ ელენესთან გამიჯნურების გამო ერეკლე II-მ რუსეთში გააძევა. თავისი ქალი კი იმერეთის მეფე სოლომონ I-ის ძმას არჩილს მიათხოვა. ელენეს დაქვრივების შემდეგ (1771) ანდრონიკაშვილი დაბრუნდა რუსეთიდან და დაქორწინდა მასზე. 1780 დანიშნეს ქიზიყის მოურავად. 90-იანი წლების დასაწყისში ერეკლე II-ის დავალებით იბრძოდა იმერეთში თავისი გერის დავით არჩილის ძის (შემდეგში სოლომონ II) გასამეფებლად. 1795 თავი ისახელა კრწანისის ბრძოლაში.