Anjani
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Bébas mawi basa Jawi
Dewi Anjani iku putra pambarepe Resi Gotama seka Grastina karo widodari Dewi Indradi. Asline, Anjani iku ayu kaya widodari. Dening ibune, Anjani diwenehi Cupumanik Astagina. Cupu iki bisa dienggo ndeleng prastawa ing ngendi wae, angkasa lan bumi, nganti trap kaping pitu. Cupu kuwi saka Bathara Surya.
Adhine loro, Sugriwa lan Subali, ngerti lan kepengin. Resi Gotama banjur ngerti perkara Cupu Manik Astagina iki. Anjani ditakoni ora gelem ngaku, amarga pancen iki wadi. Resi Gotama nesu, Dewi Indradi disepata dadi tugu lan dibuwang nganti tapel wates Alengka.
Sugriwa, Subali, lan Anjani banjur rebutan cupu mau. Resi Gotama banjur mbuwang cupu iku ing tlaga Sumala. Wong telu ngoyak kanthi dikancani Jembawan, Menda, lan Suwarsih. Nalika wong-wong mau njegur ana ing tlaga, wong-wong banjur salin rupa dadi wanara. Wong-wong mau dadi wanara amarga nduwe solah tingkah kaya kethek.
Resi Gotama ora bisa apa-apa nyumurupi kahanan iki. Anak-anake dikon supaya tapa supaya salin rupa maneh dadi manungsa. Anjani tapa dadi cantoka (kodhok) ing tlaga, Subali tapa ngalong (kaya kalong), lan Sugriwa tapa ngidang (kaya kidang).
Ing tapane, Dewi Anjani katekan dening Bathara Bayu lan andum asmara. Seka kedadeyan iki banjur lair Anoman.
