Sólarhringur

Úr Wikipediu, frjálsa alfræðiritinu

Lengd Sólarhringsins var upphaflega ákvörðuð út gangi sólar, en samkvæmt jarðmiðjukenningunni sem þá var við lýði var talið að sólin gengi í kringum jörðina. Nú er vitað að sólin gengur ekki í kringum jörðina, heldur er það öfugt (sólmiðjukenningin). Ástæðan fyrir því að sólin virðist ganga í kringum jörðina er sú að jörðin snýst um möndul sinn um það bil einu sinni á hverjum sólarhring.

Sá tími sem það tekur jörðina að snúast einn hring um möndul sinn er raunar ekki nákvæmlega sólarhringur, þar munar fjórum mínútum. Í raun tekur einn möndulsnúningur 23 klukkustundir, 56 mínútur og 4,091 sekúndur. En á þeim tíma sem einn möndulsnúningur tekur, hefur jörðin færst áfram á braut sinni um sólu, og því hefur afstaða jarðar og sólar breyst. Það þýðir að jörðin þarf að snúast örlítið lengra til að sólin virðist á sama stað á himninum. Það tekur 3 mínútur og 55,909 sekúndur.

Þess vegna er sólarhringurinn nákvæmlega 24 klukkustundir (sem eru 1440 mínútur, eða 86400 sekúndur), þótt einn snúningur jarðar sé í raun aðeins styttri. Nú er venja að telja sólarhringinn byrja klukkan 0:00:00 og enda einni sekúndu eftir klukkan 23:59:59, en þá er klukkan annað hvort 24:00:00 eða 0:00:00 næsta sólarhrings og er þessi tími kallaður miðnætti.