Mastodon
Úr Wikipediu, frjálsa alfræðiritinu
Mastodon er bandarísk hljómsveit frá borginni Atlanta í Georgíu. Oftast er talað um að Mastodon spili heavy metal en deilur ríkja um hvaða undirflokki hljómsveitin tilheyrir. Stíll sveitarinnar einkennist af þungum og oft á tíðum teknískum gítarleik, flóknum og jazz-skotnum trommuleik, drynjandi bassa og rifnum söng.
Efnisyfirlit |
[breyta] Saga sveitarinnar
Mastodon var stofnuð árið 2000 þegar Brann Dailor og Bill Kelliher, fyrrverandi meðlimir Today is the Day og Lethargy, fluttu til Atlanta og hittu Troy Sanders, fyrrverandi meðlim Four Hour Fogger og Social Infestation, og Brent Hinds, fyrrverandi meðlim Four Hour Fogger. Sveitin hljóðritaði demo árið 2000 sem er oftast kallað „9 song demo“. Á þeim upptökum syngur Eric Saner, sem var söngvari sveitarinnar um skamma hríð þegar hún var að byrja. Eftir að sveitin hafði tekið upp annað demo sem kom út á 7" myndadisk hjá plötufyrirtækinu Reptilian Records skrifaði sveitin undir plötusamning við plötufyrirtækið Relapse Records árið 2001.
Sama ár gaf sveitin út sína fyrstu opinberu útgáfu, þröngskífuna Lifesblood og fylgdu henni eftir árið 2002 með breiðskífunni Remission. Lagið March of the Fire Ants náði töluverðum vinsældum.
Árið 2004 gaf sveitin svo út þemaplötuna Leviathan sem er byggð á Moby Dick, skáldsögu eftir Herman Melville. Platan hlaut mikið lof og var valin plata ársins 2004 af tímaritunum Revolver, Kerrang!, og Terrorizer.
Nýlega skrifaði sveitin undir samning við Warner Music. Árið 2006 var 9 song demo endurútgefið af Relapse Records undir nafninu „The Call of the Mastodon“. Auk þess gaf sveitin út DVD-mynddisk sem bar heitið „The Workhorse Chronicles“. Mynddiskurinn inniheldur heimildarmynd um sögu sveitarinninnar, tónleikaupptökur og tónlistarmyndbönd. Búist er við næstu breiðskífu sveitarinnar í ágúst árið 2006 og mun hún líklega heita Blood Mountain. Sveitin mun einnig flytja lagið Orion á plötunni Master of Puppets: Remastered sem er plata gefin út af Kerrang! til heiðurs Metallica.
[breyta] Útgefið efni
- 9 song demo (2000)
- Slick Leg (þröngskífa, 2001)
- Lifesblood (þröngskífa, 2001)
- March of the Fire Ants (þröngskífa, 2002)
- Remission (2002)
- Emerald (split 7", 2003)
- Blood and Thunder (smáskífa, 2004)
- Leviathan (2004)
- Call of the Mastodon (2006)
- The Workhorse Chronicles (DVD, 2006)
[breyta] Núverandi meðlimir
- Troy Sanders - Bassi, söngur
- Brent Hinds - Gítar, söngur
- Bill Kelliher - Gítar, söngur
- Brann Dailor - Trommur
[breyta] Fyrrverandi meðlimir
- Eric Saner, söngur
