Porcelano

From Wikipedia

Porcelano esas inventita en Chinia. On komencis produktar porcelano mem du yar-mil ante nun. Por Europani la sekreso dil porcelano detekteskis erste dum 18ma yar-cento.

[redaktar] Historio di porcelano

La unesma ceramika objekti produktesis en la Valo dil Flava Fluvio dum Zhou-dinastio (1120 aK – 249 aK). La produkto dil precipua porcelano komencis dum Han-dinastio (206 aK – 221 pK), kande on facis nigra- e verda-glezita porcelano. Dum Tang-dinastio (221–681) Chiniani apertis marala voyo ad India, Persia e For-Esto, e la verda-glezita porcelano divenas tre demandita exportacuro.

Ye la fino di Tang-dinastio on komencis produktar anke blanka objekti porcelana. Por la produkto di diversa poti, vazi, eskudeli, edc., on uzeskis la maxim delikata(?) blanka argilo, altradice, kaolino. Dum Song- e Yuan-dinastio (960–1368) la parkoquala e glezala tekniko developis, ed en manui dil habila ceramikisti naskis klasika porcelan-objekti. La formo, glezuro ed ornamenti suportis una l’altra. Dum Yuan-ero on komencis uzar figurativa e ornamentala motivi. La kolori esis blua e reda.

L’ ero dil blua-blanka porcelano komencis dum Ming-dinastio (1368–1644). La poti e vazi esis ornamentizita per flori e viti. Ye 16ma yar-cento on piktis adsur porcelano Araba e Persiana citati, uceli e altra animali, peizaji e anke miti e legendi.

Ye komenco dil Qing-dinastio (1644–1911) on exportacis ad Europa tre multa Chiniana porcelano. Anke la qualeso dil produkturi pluboneskis. Dum 17ma yar-cento Europani konoceskabis kafeo e teo, qui ne esis konvenanta drinkar ek metala kupo. Pro ta on komencis exportacar ek Chinia anke kafeala servici, qui esis en formo Europala ma en ornamenturi Chiniana. On prenis la modelo por la porcelana objekti de arjenta objekti barokala. Generale la porcelana objekti esis blua-blanka ma on produktis anke multakolora vazi, poti, kupi, pleti.

Nune l’ anciena porcelana objekti Chiniana esas valorita che la kolekteri.