Thich Quang Duc
From Wikipedia
Ni Thích Quảng Ðức, (naipasngay idi 1897) ket maysa a Vietnamese a Budhista a monghe a nangpuor iti bagbagina iti maysa a makumikom a nagkurusan iti Saigon idi Junio 11, 1963, kas panangipakita ken panangipariknana iti protestana kontra iti panangtrato ti administrasion ni Primo Ministro Ngo Dinh Diem a panangidadanes iti relihion a Budhismo.
Ti aramidna a bukod a pananguram iti bagina, nga inulit met ti dadduma kalpasanna, ket nasaksian ni David Halberstam, maysa a reporter ti New York Times, a nangisurat:
Maimatangakto manen daydiay a buya, ngem ti naminsan ket kuston. Sumsumged a tao; in-inut a kumbet ken kumriit ti bagina, ngumisngisit ti ulona a makmakset. Agad-adiwara iti angin ti bang-i ti mapupuoran a lasag ti tao; nakakaskasdaaw man a nagbiit a mauram ti bagi ti tao. Iti likudak mangngegak ti saning-i dagiti agar-aribungbong a Vietnamese. Naklaatak la unay ket diak makasangit, mariribukanak unay ket diak makaikur-it wenno makapagsaludsod, napakigtotanak uray la koma agpanunot... Ket idinto a mapupuoran saanna man laeng a pulos a kinuti ti uray ania a piskelna, di man laeng nangyesngaw iti uray ania nga uni, ti natalna a pakinakemna ket maiduma unay kadagiti agsasangit a tattao iti lawlawna.
Inrurumen ni Madam Nhu, First Lady iti Vietnam idi ken maysa nga Catolico, iti ipapatay ni Quang Duc. Imbagana nga palakpakanna manen no mabuyana iti ipupuor ti maysa nga monghe.
Kalpasan iti pinakatay ni Quang Duc, iti gimong nga Budhista idiay Saigon ket pinadasda nga palpasen nga puoran iti nabati nga pusona ngem ad-adda nga timmangken. Kinunada garud nga nasantoan iti pusona ket indulinda iti Banko Reserve ti Vietnam. Iti monasteria ni Duc ket nakadisso iti ruar ti Huế idiay tengnga ti Vietnam.
Daytoy nga ladawan ni Quang Duc ket inaramat iti banda nga Americano a Rage Against the Machine iti umuna nga albumda idi 1990s.