Wikipedia:Pagiwanwanan

From Wikipedia

Ti linaon daytoy a panid ket ofisial a pagalagadan iti Wikipedia. Addaan daytoy iti pannakaawat ken pammalubos iti baeten dagiti editor daytoy a Wikipedia ket mabigbig a kas maysa nga standard a masapul a suroten ken tungpalen ti amin. Malaksid iti babassit a panangbalbaliw, mabalin nga aramaten ti panid para panagsasarita tapno mangisingasing kadagiti panagbalbaliw kadagitoy nga alagaden.

Kangrunaan a Linlinteg ken Annuroten iti Ilokano Wikipedia

Copyright, saanka a mangcopia iti ar-articulo, ladladawan, wenno dadduma pay a bambanag, uray sadino man a naggapuan wenno nagtaudanna, no dimo impakada iti akinsurat, akin-gapuanan, wenno akinkukua iti copyright. Illegal daytoy, kabsat. Awan koma ti agkusit wenno agmamanok ditoy Gimongtayo.

Nawaya a panakaiwaras, babaen ti GNU Lisensia iti Nawaya a Documentasion. Masapul a maawatam a dagiti aramidem, buklem, suratem, ken ikabil ditoy Ilokano Wikipedia ket mabalin a maiwaras ken mabalbaliwan nga awanan bayad ken responsibilidad. No dimo maawat wenno ipagelmo nga adda sabsabali a nawaya a mangaramat ken mangbalbaliw iti sinurat wenno tagikukuam, maibalakad a saanmon nga ikabkabil daytoy, wenno saanka a makisali ditoy a projecto.

Natimbang a pammati wenno awan ay-ayonanna a panirigan, iti masasao ti Engslih a neutral point of view. Amintayo ket addaan kabukbukodan a pammati ken panirigan iti nadumaduma a bambanag, kanigid wenno kanawan, agpangato wenno agpababa. Pangngaasitayo koma ta padasentayo ti magna iti tengnga. Facts, laeng. Awan ti agenda, awan ti mangaskasaba, awan ti mangkankanunong iti maymaysa a pammati wenno opinion uray ania nga urit ti pampammatim. Ensiklopedia daytoy, saan a simbaan.

Kasparigan:

1. Ni Ferdinand Marcos ket naipasngay idiay Sarrat, Ilocos Norte. Fact. Mayat.
2. Ni Ferdinand Marcos ket isu ti kalaingan a presidente ti Filipinas. Opinion daytoy. Madi.
3. Ni Ferdinand Marcos ket bastos a lakay, okinnana! Opinion a makadadael. Madi.

Ania pay dagiti madi ken mayat iti Ilokano Wikipedia

Ti Ilokano Wikipedia ket gimongtayo amin a Samtoy a kayatna a makita a mangitampok, mangpadakkel, mangsalimetmet iti nasudi a pagsasaotayo. Pangngaasitayo, agsisingpettayo met, a. Awan ti agaapa, agpipinnukkaw, agiinninsulto. Bagitayo iti Iloko. Let's all have a vigorous discussion of its development.

Ti Ilokano Wikipedia ket agpaay a pagadalan ken pagsursuruan iti nagduduma a bagi ti ammo ken pannakaammo. Saan a lugar a pagikampaniaan wenno pagiwarawagan iti kabukbukodan wenno personal a politica wenno pammati. Kitaen ti natimbang a pammati ken panirigan iti ngato.

Amin ket maawis nga agsurat, makigamulo, makitinnulong iti daytoy a projecto. Saanka a bumdeng, agduadua wenno agbabain. Adukami a mangibaga wenno mangimano a mangtaming kadagiti articulo ditoy no kas pagarigan adda kammali wenno biddut.