Jan Ewangelista Purkyně

Z Wikipedije

Jan Ewangelista Purkyně (*1787; †1869) bě wulki čěski wědomostnik a lěkar, kotryž zajimowaše so jara za słowjanske ludy a rěče. Wón skutkowaše we Wrocławju. Pola sebje doma wučeše pólskich a serbskich studentow čěsku rěč a organizowaše słowjanske studentske kružki. We Wrocławju zeznajomi so z Janom Arnoštom Smolerjom, kotryž bydleše potom w Purkynjowym domje a bě wučer a kubłar jeho synow Karla a Emanuela a bibliotekar Purkynjoweje wulkeje biblioteki. Smoler je we Wrocławju załožił serbski kružk „Akademiske towarstwo za serbske stawizny a rěč”. Purkyně bě protektor tutoho kružka. Purkyně znaješe tež Jordana a druhich Serbow, kotrychž wón wučeše, zo dyrbja so wo swoju maćeršćinu starać. Purkyně napisa wjele nastawkow wo Słowjanach, w kotrychž je tež Serbow naspominał.