Estatuto de Autonomía de Galicia (1981)
Na Galipedia, a wikipedia en galego.
O Estatuto de Autonomía de Galicia (sinxelamente Estatuto de Galicia), é a norma institucional básica de Galicia. No marco da Constitución española de 1978, o Estatuto de Galicia, recoñece a esta comunidade autónoma a súa condición de nacionalidade histórica. Di que os poderes nos que se basea son o propio Estatuto, a Constitución e o pobo galego. Establece un marco democrático de soliedaridade entre todos cantos integran o pobo galego.
Tivo o seu precedente no Estatuto de Autonomía de Galicia de 1936, aprobado o 28 de xuño de 1936 por maioría en referendo, cando era xefe do goberno da Segunda República o galego Santiago Casares Quiroga.
No estatuto recóllese entroutras cousas:
- O recoñecemento do galego como lingua propia de Galicia (e a cooficialidade co castelán)
- Os símbolos propios do país galego: bandeira, escudo,...
- A división e organización administrativa do territorio en provincias, comarcas e parroquias rurais
- O recoñecemento das comunidades galegas no estranxeiro
- Facenda e patrimonio propios
- Diversas competencias de acordo coa Constitución e as leis de solidariedade entre as comunidades que conforman España
O 6 de abril de 1981, este estatuto foi asinado por El Rei Xoán Carlos I de España, e polo presidente do goberno Leopoldo Calvo-Sotelo y Bustelo, no Palacio Real de Madrid.