Moarden fan Dokkum

Monumint oan de Wâldwei

De Moarden fan Dokkum wienen op 22 jannewaris 1945 in Dútske ferjildingsaksje.

Op freed 19 jannewaris 1945 waarden trije fersetslju wylst se troch de Sicherheitsdienst transportearre waarden befrijd troch it Ferset. Ien fan harren, de Dokkummer apteker Gunster, wie in wichtich man yn it Dokkummer ferset, dat trochdat er finzen naam wie, wienen der in protte minsken yn gefaar. Op de Falom waard dêrom de brêge iepenset om de auto fan de Sicherheitsdienst stopje te litten, en doe't dat slagge waard dy oerfallen. By de aksje rekke ien Dútser om hals, en net folle letter ferstoar in twadde.

As ferjilding waarden op moandei 22 jannewaris tsien finzenen út Ljouwert helle, en nochris tsien út Grins. Dy hienen neat mei dy oerfal te krijen, mar se waarden meinaam om in boadskip dúdlik te meitsjen. De tweintich manlju waarden nei Dokkum brocht, en dêr oan de súdkant fan de stêd, oan de Wâldwei, yn groepkes fusilearre. Elts groepke moast earst de liken fan de eardere groep rjochtlizze, en dan waarden se sels deasketten. De liken bleauwen in etmel lizzen om it boadskip noch better oerkomme te litten.

Anno 2005 wurde de Moarden fan Dokkum hieltiid noch alle jierren betocht.