Xuché
De Uiquipedia
El Xuché o Juche (en coreanu: 주체) ye la base ideolóxica del estáu de Corea del Norte. Una frase atribuía al líder norcoreanu Kim Il Sung define'l xucheismu del siguiente mou: "En poques palabres, la idea Xuché significa que los propietarios únicos de la revolución y de la construcción posterior son les mases".
Tabla de conteníos |
[editar] Fundamentos
El Xuché ye un sistema filosóficu ya ideolóxicu cuyo desenvolvimientu se-y atribúi al propio Kim Il Sung. El so fíu y continuador na xefatura d'Estáu de Corea del Norte, Kim Yong Il, ye oficialmente l'encargáu de la so interpretación. Vien a ser una adautación del comunismu leninista a la cultura coreana y a les necesidáes propies del Gobiernu de la República Democrática Popular de Corea. Ta considerao una cadarma argumental defensiva, tanto énte la disidencia, como pa refugar influencies esternes, incluso dende los Gobiernos de corte comunista.
La so idea cimera ye que l'individuo ye responsable del so propiu destín. Esa máxima, nun sistema revolucionario, tresllada a la suma d'individuos que componen les mases populares l'autoría de la revolución y el so desenvolvimientu. Desa mena, caún de los norcoreanos tien la so estaya de responsabilidá nel destín de la colectividá. La revista norcoreana "Korean Review" señala que "L'afitamientu del xucheísmu significa adoptar el xeitu de mayestru de la revolución y reconstrucción del to propiu país. Esto significa un proceder independiente y creativu de caún cola fin d'atopar les soluciones a los problemes que puean apaecer nel procesu de revolución y construcción". Asina esplicaríase la principal aplicación práctica de la teoría kimilsunguista, cuyo enfotu cimeru sería "facer posible l'afitamientu de los finxos políticos del Estau pente'l desendolcu d'una indestructible cohesión y xunidá política ya ideolóxica". Esa afirmación xustifica darréu la llucha escontra la disidencia y la influencia estranxera. Si bien la "xunidá ideolóxica y política" favoratible a la revolución daría punxu a delles desviaciones de la llínea marcada gracies a la premisa del proceder "independiente y creativu" que podríen sumase a les directrices revolucionaries, lo cierto ye que la doctrina y la bibliografía xucheístes esponen abondo les funciones deseyables de cada colectivu revolucionario. Asina, los medios de comunicación han asoleyar los avances que se produzan na revolución y construcción del "paraísu de los trabayadores", colo que se refuguen aquelles informaciones y actitudes que puean suponer un pasu atrás nel desendolcu de la revolución.
[editar] Teóricos
La ideoloxía xucheísta, o "kimilsunguista", toma'l nome d'una teoría filosófica tradicional coreana, el Xuché. Dizse que la Idea Xuché foi inspirada a Kim Il Sung pol monte Paektu, una cume mítica pa los coreanos y tou un símbolu de la nación. Kim Il Sung foi l'ideólogu y promotor, con decenes de volúmenes espublizaos. Otros, como Wang Yan Yop, entamaron la xera de da-y un sentíu práuticu a la obra magna del "Gran Líder", (aunque luego protagonizare una de les más célebres deserciones de la R.P.D.C.). Kim Il Sung, como'l so fíu Kim Yong Il, son dafechu consideráos como los auténticos responsables del desendolcu de la doctrina Xuché, el primeru afitándola, el segundu actualizándola sigún los nuevos retos de la revolución. Kim Il Sung espoxigó una doctrina autodefensiva, contrapuesta a la "dependencia" que de los Estaos Uníos tendríen, por exemplu, los coreanos del sur. El xucheísmo ximelga la bandera de la soberanía nacional popular, que pon los finxos d'un sistema políticu al marxe d'influencies esternes que puedan dixebrar el bon desenvolvimientu de la transición al comunismu. Desta mena, Kim Yong Il sigue configurando anguaño una doctrina que da un sentíu ideolóxicu a lo que na práutica ye'l réxime de Corea del Norte.
[editar] Cites
En 1975, tres d'aprobase la constitución norcoreana de 1972, Kim Il Sung asoleya "¡Xuché!", obra na qu'afita la base de la teoría que da sentíu ideolóxicu a la estructura estatal norcoreana. Delles muestres del pensamientu kimilsunguista son les siguientes frases incluyíes nel llibru.
- "Tamos faciendo la revolución coreana. Y tolo que-y afecta, los coreanos saben cómo lu afrontar meyor que naide. L'aspeutu fundamental de la revolución coreana, y que los coreanos decidimos, ye que la nuesa fuercia ye'l factor decisivu na nuesa victoria".
- "Dengún foriatu pue darnos la receta de qué facer cola nuesa revolución. Pa poder llevala a bon fin con éxitu, los coreanos, ellos mesmos, deben utilizar el so cerebru, resolver los problemes col so enfotu, un enfotu que debe asitiase conforme a los intereses de la revolución coreana".
- "El nuesu partíu adoptó con fuercia la idea del Xuché, pa resolver los problemes de la revolución y la construcción del socialismu con independencia, acordies a les condiciones propies del nuesu país, colos nuesos propios enfotos; y nosotros, tol pueblu, formaremos un piñu alrodiu del espíritu d'una autoafirmación que mos llama a andechar na revolución y construcción del socialismu y el comunismu nel nuesu país, con los nuesos enfotos y los recursos del nuesu país, separtándonos de la idea de depender d'otros".
[editar] El Xuché nel exterior
L'únicu intentu d'implantar el kimilsunguismu fuera de la República Democrática Popular de Corea foi pola parte de la Rumanía de Nicolae Ceaucescu, ensin ésitu. Los intentos de Corea del Norte d'esparder el Xuché como fórmula p'algamar el comunismu zarráronse dafechu pocos años dempués de la so puesta en marcha nel país. Anguaño, atópense dellos grupos d'estudiu del xucheismu en países como Reinu Uníu, España, Brasil, Xapón, Perú o Australia, ente otros.
[editar] L'almanaque Xuché
Tres de l'aprobación de la constitución de 1972, Corea del Norte oficializó el calendariu Xuché, basáu nel calendariu gregorianu y que finxa l'añu unu en 1912 dempués de Cristu, añu de la nacencia de Kim Il Sung. Corea del Norte finxaba asina el so propiu calendariu revolucionariu, que s'anicia nel añu en que naz la so cadarma ideolóxica, el Xuché (reforzando asina la identificación de la ideoloxía estatal cola figura del "Gran Líder" Kim Il Sung). Polo xeneral, nos textos coreanos figuren en primer lugar l'añu xuché y dempués el cristianu: Xuché 95 (2006).
[editar] Ver tamién
[editar] Enllaces esternos
- Institutu Internacional de la Ideoloxía Xuché (n'español)
- Juche Idea Study Group of England (n'inglés)
- Songun Politics Study Group USA (n'inglés)
- Young Juche League UK (n'inglés)
- Young Juche League forums (n'inglés)