Xuan Bello
De Uiquipedia
Xuan Bello ye ún de los escritores más destacaos de la lliteratura contemporánea en llingua asturiana.
Xuan Bello Fernán nació en Paniceiros (Tinéu) en 1965, anque treslladose a vivir a Tudela Veguín y , más tarde, a Uviéu. Nesta ciudá, na Facultá de Filoloxía y na tertulia Oliver coincide con escritores como Antón García, José Luis García Martín, Víctor Botas, Berta Piñán, Fonsu Velázquez, Xuan Ignaciu Llope o José Luis Piquero.
En 1982, con malapenes 16 años espublizó’l primer llibru de poemes, escritu n’asturianu occidental Nel cuartu mariellu. El so llabor poéticu, aparte de los poemes y versiones espublizaes en revistes universitaries y en Lletres asturianes, siguió con El llibru de les cenices (1988), Los nomes de la tierra (1991) , El llibru vieyu , col qu’algamó’l premiu Teodoro Cuesta de poesía en 1993 y Los Caminos Secretos (1996). En 1999 espublizose una antoloxía billingüe (asturianu-castellán) de la so poesía, col títulu de La Vida Perdida.
Xuan Bello ye ún de los principales animadores de la lliteratura asturiana, gracies a les sos traducciones, especialmente d’autores portugueses o a les collaboraciones en revistes como Clarín, Adréi y Zimbru, siendo cofundador de les dos últimes con Berta Piñán y Esther Prieto respectivamente. Tamién tien publicao nos diarios La Nueva España y El Comercio y nel selmanariu Les Noticies, del que foi director ocho años. En 2005 foi responsable de la la organización de la Xunta d’Escritores Asturianos.
Sícasí, la fama lliteraria llego-y gracies a la traducción al castellanu de Hestoria Universal de Paniceiros, que recibió’l premiu Ramón Gómez de la Serna y convirtióse nun de los llibros más destacaos polos críticos españoles en 2003. Otros llibros suyos, a caballu ente l’ensayu y el relatu, son Pantasmes, mundos, laberintos (1996), La memoria del mundu (1998), Meditaciones nel desiertu (2003) y Los Cuarteles de la memoria (2003).
[editar] Obra
POESÍA
- Nel cuartu mariellu (1982).
- Llibru de les cenices (1988)
- El llibru vieyu (1994)
- Los caminos secretos (1996)
- La vida perdida (1999). Antoloxía billingüe de la so poesía.
ENSAYU
NARRATIVA
- Pantasmes mundos, laberintos (1996). Historia apócrifa de la lliteratura asturiana.
- La memoria del mundu (1998).
- Historia universal de Paniceiros (2002). Traducción castellana de Hestoria universal de Paniceiros (publicada en 2004)
- Los cuarteles de la memoria (2003) .
- Meditaciones nel desiertu (2003). Mezcla de diariu y ficción.
INFANTIL
- El nuberu ye bona xente (2003).
TRADUCCIONES
- José Luis Olaizola : Bibiana y el so mundu (1989).
- Álvaro de Campos (heterónimu de Fernando Pessoa): Estancu y otros poemes (1989).
- Robert Louis Stevenson : El casu raru del dr. Jeckyll y mr. Hyde (1995).
- Arthur Conan Doyle: Tres aventures de Sherlock Holmes (1995).
- Álvaro Cunqueiro: Escuela de melecineros y fábula de varia xente (1997).
- Jaume Cela: Silenciu nel corazón.
- Sieglu XX cambalache ( versiones de Kipling, Pound, Ungaretti, Auden, Ferrater, Elitis, de Sena, Pavese...)
- Alfonso Daniel Rodríguez Castelao : Coses (2000)
- Jordi Sierra i Fabra: Nun llugar que llamen guerra (2002)
OTROS
- Alfaya ( a comuña con Berta Piñán 1989). Material didácticu
- L’alborá de los malvises (1999). Edición Crítica de la obra de Constantino Cabal.
- El sentimientu de la tierra (1999). Antoloxía de la lliteratura asturiana contemporánea.