Home de Vitruvio
De Uiquipedia
L'Home de Vitruvio ye un famosu dibuxu acompañáu de notes anatómiques de Leonardo da Vinci realizáu alredor del añu 1492 nún de los sos diarios. Representa una figura masculina esnuda en dos posiciones sobreimprentaes de brazos y piernes ya inscritu nún círculu y un cuadráu. Tamién se conoz como'l Canon de les proporciones humanes.
El dibuxu ta realizáu en llápiz y tinta y midi 34,2 x 24,5 cm. Anguaño forma parte de la coleición de la Galería de l'Academia de Venecia.
Trátase d'un estudiu de les proporciones del cuerpu humanu, realizáu a magar de los testos del arquiteutu de l'antigua Roma Vitruvio -De Architectura-, del que'l dibuxu toma'l so nome. El cuadráu ta centráu nos xenitales, y el círculu nel embeligu. La relación ente'l llau del cuadráu, y el radiu del círculu ye la razón áurea. Pa Vitruvio'l cuerpu humanu ta dividíu en dos metaes polos muérganos sexuales, mentantu que l'embeligu determina la seición áurea. Nel recién ñacíu l'embeligu ocupa una posición media, y col crecimientu migra fasta la so posición definitiva nel adultu.