Rivendell
De Biquipedia
Rivendell (En sindarin: Imladris) ye o nombre en anglés d'un puesto d'abanzata de os Elfos en a Middle-Earth (Tierra Meya u Tierra de o Meyo), un mundo imachinario creyato per J.R.R. Tolkien. Tamién se i refiere bella bez como "a zaguer casa acullidora á l'Este de o mar". Estió fundato per Elrond en tiempos de a Segunda Era de a Tierra Meya, cuatre u zinco mil años antis de l'ocurrito en O siñor d'os Aniellos. Amás d'Elrond, d'altros elfos de renombre que i abitan son Arwen y Glorfindel.
O nombre de Rivendell en anglés sinifica "bal profundamén sarrallata", de riven "sarrallato, fendito" y dell "bal". Bellas traduzions como as feitas ta las bersions castellana y catalana de o libro, Rivendel y Rivendell respeutibamén, no traduzen o conzeuto, eliminando sólo que a le final en castellano ta acomodar o nombre foneticamén, y conserbando-la o catalán, probablemén ta amanar-lo á la toponimia catalana, como en Sabadell. Manimenos, son muitas as luengas que miran de traduzir u adautar o toponimo. Asinas, a denominazión franzesa ye Fondcombe "Coma fonda"; a italiana, Gran Burrone "Gran fueba" u Forraspaccata "Galacho rallato"; l'alemana, Bruchtal "Bal fendita"; etz. En altros casos, se dan doples bersions, como en a luenga portuguesa, an se conserba Rivendell en a traduzión ta Portugal pero se traduz como Valfenda en a brasileña. O libro no ye estato traduzito encara ta l'aragonés, an que una simple adautazión fonetica podría dar Ribendel. Con tot, parex preferible una traduzión de o conzeuto. Muitas podrían estar as opzions posibles: Comafonda, Comarrallata, Baldarripa, Baldosarrato, Ballifonda...
En O Hobbit, Bilbo Baggins fa estacha en Rivendell chunto con os nanos de camín ta o Lonely Mountain (Mon Solitario) y chunto con Gandalf de tornata ta la Shire (Comarca, Redolada).
En O siñor d'os Aniellos, Frodo Baggins y os suyos compañers hobbits biachan ta Rivendell, an se troban con Bilbo, que se i yera retirato dimpués de a suya fiesta de cabodaño. Tamién complegan en Rivendell bels elfos, nanos y ombres con diferens encomiendas, si bien en o Conzello d'Elrond aprenden que totas as encomiendas son relazionatas con o destín de l'aniello unico y deben de dezidir qué ferán con él. Á la fin, son os hobbits os que enfluyirán en a dezisión.
Rivendell ye situata á la ribera d'un galacho de o río Bruinen (un de os camins prenzipals enta Rivendell biene d'un rasal amanato de o Bruinen), pero prou amagato en os tremedals y baxans de os Hithaeglir (Mons de boira).
O nombre sindarin ta Rivendell (de o cual no ye que una traduzión) ye Imladris, que sinifica "bal fonda de a ralla".