Opposition (Astronomie)

Us der alemannische Wikipedia, der freie Dialäkt-Enzyklopedy

astromomischi Konjunktion un Opposition

Dialäkt: Markgräflerisch (Ebringe)

As Opposition bezeichnet mer in dr Astronomi dr Aspekt, wo sich zwei Himmelskörper am Himmel im Winkelabstand vu 180 Grad befinde.

Im Regelfall interessiert numme d'Opposition vume e Himmelskörpers zue dr Sunne vu dr Erde us gsähe, denn in sällem Fall het dr Himmelskörper dr gringst Abstand zue dr Erde un isch die ganz Nacht yber z'sähe, wobi er um die astromonisch Middernacht am höchste yber em Horizont stoht. Allerdings wird debi wäge dr Exzentrizität vu dr Planetebahne dr gringst Erdabstand hüffig nit exakt zum Oppositionszittpunkt erreicht, doch isch die zue beobachtend Differenz vu wänige Däg im Regelfall ohni praktische Bedütig.

Stehn zwei Himmelskörper fast zue dr gliche Zitt in Opposition zue dr Sunne, so cha es wäge dr schinbare Schleifebahne (Oppositionsschleife) vu dr beteiligte Himmelskörper zu ere so gnennte dreifache Konjunktion chumme. Debi begegne sich die beide Himmelskörper dreimol im zittliche Abstand vu numme wänige Munät.

Drefachkonjunktione, vor allem sälli vum Jupiter un Saturn, hän besunders in dr Astrologi immer wiider Aloss fer die wildiste Spekulatione gä.

Stoht dr Erdmo in Opposition zue dr Sunne, so hämmer Vollmo.

Himmelskörper, wo wie die undere Planete Merkur un Venus innerhalb vu dr Erdbahn um d'Sunne umlaufe, chänne nie in Opposition chumme und sind doher stets numme am Obend- oder Morgehimmel, aber nit während dr ganze Nacht z'sähe.

Sunderforme vu dr Opposition

• Vollmo
• Mofinsternis

Lueg au: Syzygium

• Konjunktion
• Quadratur
• Sextil
• Trigon