Citroën 2CV
Us der alemannische Wikipedia, der freie Dialäkt-Enzyklopedy
2005 nach aune Regle va de Handwärkskunscht komplett reschtauriert va Yeti u Heinz
 |
Dialäkt: Seislerisch) |
De Döschwo (Citroën 2CV, ma siit o deuche, änta) isch as usserordentlich popülärsch Outo gsi. Trotzdäm wüsse vüu Jungi bereits nümme was a Döschwo überhaupt isch. Uf de anderi Sita va de Skala git's aber o no unwarschinlich füu Liebhaber wa a Szene büude u de Döschwo o zwenzg Jahr nach em verordnete Tod am Läbe erhaute. Zu där igschworeni Gsäuschaft köre o diversi Autogarage wa uf dä Tüp, nämlich uf d'Änta iigschwore si. Zum Bispüu d'Deuxchevauxgarage vam Gregi Trefzer z'Bärn. Är isch glichzytig o Stammmitglied va de Bärner Döschwo Fründe.
[ändere] De Döschwo het damals sölle 'ds ifache Volch' mobilisiere.
As spartanisches Outo mit era unglublichi Züuvorgaab: 'Entwärfet as Outo mit Platz für zwü Bure i Stüfle ume na Zentner Häppere (Kartoffeln) oder ima Fässli Wii. As muess mindeschtens 60 km/h schnell sii und debi nid meh aus drü Liter Benzin uf 100 km verbruche. Usserdem soll es o schlächtischti Fäudwääge chene bewältige u so ifach z'bediene sii, dass sogar a ungüebti Fahreri problemlos mit ihm zcherchunnt. As muess dezue usgsproche guet gfäderet si, a so, dass a Chorb vou Eier a Fahrt uber houprigi Fäudwäge unbeschadet überstiit. U schliesslich muess das nüen Outo wäsentlich billiger sii aus üsi 'Traction', uf ds Uusgseh chunts aber überhaupt nid a.' so het de Pierre Jules Boulanger zu sim Chefkonstruktör gsiit.
[ändere] Z'gsteckte Züu hi si erreicht.
Aber dass das Outeli a so erfougriich würti si, dass es fasch unveränderet vo 1948 bis 1990 buut chunt, und alli Versueche va Zitroen a Nachfouger z'installiere überläbt, das hetti sich de Boulanger o nie chenne erdeiche. Immerhin si im Luuf va de Zyt 3.872.583 'Limusine' u 1.246.306 'Chaschteänte' verchufft cho. U dezue no füu sogenannti Derivat wie d'Dyane, de Ami 6 u 8, de Mehari, fur nume di wichtigschte ufzzölle.
