Motî da Léonard
Èn årtike di Wikipedia.
Li motî da Léonard (k' on dit eto motî da Linåd; côde C1 el djivêye des motîs do walon), c' est on gros motî fwait idêye pa idêye pa Lucien Léonard et eplaidî pal SLLW e 1969. Al fén, gn a, avou, des tåves alfabetikes avou les cmons nos walons, des nos prôpes, et di sacwants nos francès k' i gn a l' ratournaedje divins. Eto, li motî da Léonard abate troes djaeyes d' on côp d' warokea.
Il a stî adjinçné tot ramexhnant les mots et ratourneures walons des viyaedjes d' Annvoye, Biou et Warnin. Mins i rprind eto, e les mårcant, les mots do Motî da Pirsoul k' i n' a nén rtrové låvå.
Li motî da Léonard est fwait tot cnoxhant l' ortografeye do Motî da Haust. Li scrijhaedje lu-minme a stî spepyî pa Jean Guillaume.
Li motî da Léonard fourit l' mwaisse soûmint do motî da Somme, la k' les dnêyes sont rarindjeyes par ôre alfabetike, et do Franwal di Nameur da Chantal Denis.
[candjî] Motî da Linåd et rfondaedje do walon
C' est l' prumî gros motî do Namurwès la k' on-z a bén mostré l' diferince inte les mots ki si scrijhèt avou l' betchfessî å (rinåd, må) des cis ki si scrijhèt avou l' betchfessî ô (trô, èn ôte côp). Les deus sons si prononçnut parey dins l' Namurwès, et davance, on lzès scrijheut avou au : rinaud, mau, trau, on aute caup.
C' est dandjreus l' Jean Guillaume, ki cnoxheut bén l' adire inte les deus oyons, la k' i s' prononçnut diferinmint dins l' Eter-Sambe-et-Mouze (ô si prononce oû : on troû, èn oûte coûp), k' a stî les cåzes di ce scrijhaedje la, foirt ahessant po scrire li rfondou.