Live e walon
Èn årtike di Wikipedia.
- Po ene lisse di lives et d' motîs, loukîz a direk al djivêye di sacwants lives e walon
On live e walon, c' est on live k' eploye li walon come mwaisse lingaedje.
Les pus corant des lives e walon, droldimint, c' est les ramexhnêyes d' arimeas. C' esteut foirt li môde e 19inme et 20inme sieke, mins end a todi moens e 21inme sieke.
Après, gn a les schôtlêyes di tecses d' on metou oteur, avou des arimeas, des tchansons et des sovnances ki polèt esse des otobiyografeyes etires, kécfeye des couyonådes, des rapoitroûles, u des fåves do vî vî tins.
Gn a eto des romans et kécfeye des ramexhnêyes di noveles. Cwand li scrijheu dit bén ki c' est des sinnes k' il a cnoxhou et viké lu-minme, on djåze purade di live di sovnances.
Gn a sacwants bindes d' imådjes, et ene piceye di lives d' imådjes e walon.
N a yeu onk u deus lives rilidjeus e walon.
Les pîces di teyåte e walon ont stî lontins eplaideyes come des ptits lives.
Ene peclêyes di lives e walon sont ratournés e francès vizon vizu. Gn a eto bråmint des lives e walon ki l' adrovaedje est scrît e francès.
Bråmint des scrijhaedjes e walon sont djusse prezintés come on sillabusse, u des agrapés foyous, et cossemés på scrijheu.
Gn a sacwants coleccions d' lives e walon.
Les lives e walon sont diferins des lives sol walon, la ki li mwaisse sicrijhaedje est e francès, mins li mwaisse sudjet, c' est l' walon.
Les antolodjeyes di scrijheus walons sont ene miete inte les deus, la k' li mwaisse sicrijhaedje est e walon, mins li prezintaedje des scrijheus todi e francès.
[candjî] Vindince des lives e walon
C' est foirt målåjhey di vinde des lives e walon. Ca les djins n' ont nén stî scolés a lére li walon. Eto, divant li rfondou, tchaeke sicrijheu notéve l' accint di s' veye u s' viyaedje dins les lives. E rfondou, i fåt aveur sitî scolé po poleur lére, et gn a nole sicole ki l' acsegne.
Sovint les lives e walon sont eplaidîs a conte d' oteur. On n' les trove nén dins les livreyes. Bråmint des lives e walon sont-st eplaidî pa des soces di waloneus, avou des subzides di l' Estat (CLRE, provinces, comenes).
Li saetchaedje va d' on cint a meye egzimplaires. Li pus foirt saetchaedje, ci fourit Li vî bleu, ene binde d' imådje k' a vudî a pus di 100.000 egzimplaires.
