Li Broûli-d'-Peche
Èn årtike di Wikipedia.
Li Broûli-d'-Peche (F. Bruly de Pesches) c' est èn ancyin ptit ban del Walonreye, rebané avou Couvén.
I fåt bén fé l' diferince inte li ptit viyadje do Broûli-d'-Peche, ki s' trove å mitan des bwès, eter Couvén et Cou-des-Sårts, eyet Li Broûli, ki s' trove djusse al frontire francesse sol voye Couvén-Rocroe.
- 936 ha di bwès so 1105.
- Comene e 1825
- Hamtea: Les Parsounîs
- Eglijhe basteye e 1885 so on terén ofrou på Prince de Croy.
- Fontinne Sint Min. Perlinaedje li dimegne après l' 21 di djulete (po les maladeyes del pea).
- On hierdî djusk' e 1870
- Bunker et prezince d' Hitler e 1940
Broûli, paski c' esteut on sårtaedje å mitan d' ene foirt grande sitindowe di bwès. 50 ha ont stî pårtis e lots di 2 a 5 ha, çou k' a amoenné des novelès djins å hamtea des Parsounîs.
[candjî] Istwere
Li 17 d' avri 1941, li gazete almande “Illustrierter Beobachter” a dné ene imådje do viyaedje avou scrît dzo: Li plaece istorike del victwere dins l' Ouwess!. L' årtike dijheut: C' est di ç' viyaedje la, dins l' Årdene, k' ont stî lancîs, moennés på Führer lu-minme, les plans des operåcions k' ont stî les pus feles di l' istwere almande !
Tins del campagne di France, å moes d' may, Adolf Hitler, ki vleut shure di tot près l' avance di ses tropes dins l' France, s' aveut fwait basti on bunker å Broûli-d'-Peche. Il î a vnou passer kékes djoûs. Ça pout parete bizåre di vey èn ome come li Führer si displaecî insi. C' est moens bizåre, cwand on sait li rprotche k' a stî fwait a l' Estat-Madjor almand di dmorer bén trop lon erî des combats del prumire guere; ça åreut stî onk des motifs k' åreut fwait piede li batreye del Marne ås Almands e setimbe 1914. Hitler aveut rtinou l' luçon.
