Come ene sacwè e l' air (tecses)

Èn årtike di Wikipedia.

Come ene sacwè e l' air, c' est ene ramexhnêye di scrijhaedjes da Maggy Frisée. C' est bråmint del prôze a môde di biyet d' umeur, mins gn a eto èn arimea u deus.

Ci live la a rascodou li Pris del veye di Lidje e 2003.

Ådvins 1 Les tinmes di "Come ene sacwè e l' air" 2 Li langue di "Come ene sacwè e l' air" 3 Plaçaedje dins l' tins et dins li spåce 4 Kitaeyaedje do live

[candjî] Les tinmes di "Come ene sacwè e l' air"

C' est bråmint des sovnances do djonne tins, todi avou l' apinse ki ci vî tins la, c' esteut l' bon tins. Gn a eto onk u deus bokets istorikes, come l' arivêye des tanks amerikins. Des bokets k' i gn a cåzèt do vicaedje d' enute. Mins c' est pol discåzer, come li criticaedje d' on vijhén ki vént del veye, et k' est retrôclé dins s' måjhone, tot mancant di spotchî les djins cwand i passe grandiveuzmint dins s' bele oto. Deus bokets sont ene miete avanciveus. Li prumî cåze d' on djouweu d' guitare sol bate a Lidje, et ene pitite glawene ås crolés ouys kel vént shoûter tos les djoûs. Li deujhinme nos mostere on stoirdoe, atchté dins ene vignoûle di France, ki nos conte li spoûle di s' "vicåreye". Ene pårteye ki s' passe foû payis, et dins l' vî vî tins da Ronsard. Li prumire paskeye (Li blanke dame) est scrîte a môde d' on conte foû naturel.

[candjî] Li langue di "Come ene sacwè e l' air"

Do mo bon walon, avou l' croejhete do Levant pratikêye al leccion. Li motlî est, lu eto, foirt ritche. Nos rlevrans, metans:

Prumî fruzion: strûler l' farene dins ene grande djate.

Ene mwin k' aduzer li vosse; Ene doûce loukeure ki vs shût.

Costés noûmots, on djåze des tanks al Liberåcion, tot uzant del sorwalonde di motî "tchårs". On wåde li mot d' adon robot po djåzer des V1. Rilevans eto li noûmot Divant-lére po l' tecse metou divant d' ataker. Costé vîs mots, dins les deus troes scrijhaedjes ki djåzèt do fjhaedje do pwin, on-z åreut veyou voltî aparexhe des mots come "prusti l' påsse" (ene ovraedje todi esplikêye pa des longuès fråzes), et "ene nukete di boure" (diné på rfrancijha djaeye di boure).

[candjî] Plaçaedje dins l' tins et dins li spåce

Bråmint des sovnances si passèt en Andoûmont. Les sovnances covrèt purade les trevéns di l' Etre-deus-guere, et eto l' Liberåcion. Sacwantès spoûles si passèt a Lidje. Onk des tecses djåze d' ene emîssion so Liège-Matin, avou Robert Wasseige ki respond a Jean-Claude Balthazar.

[candjî] Kitaeyaedje do live

• Bele coviete avou on dessin di "moite nateure", da José Artus. Ci live sereut cobén li prumî d' ene coleccion "Riflorixhåjhe" (Riflorihåye).
• Coviete divantrinne.
• Dirî del coviete divantrinne: Tåve do ctaeyaedje do live.
• p. 1. L' adrovaedje (divant-lére) pa Jean-Denys Boussart, sicrît e francès.
• p. 2 a 34: les 28 sicrijhaedjes, et les enimådjants dessins da José Artus.
• p. 35 a 38: motlî, tecse pa tecse.