Chaïbia

Èn årtike di Wikipedia.

coviete d' ene rivowe do Marok avou des dessins eyet l' poirtrait da Chaïbia dins l' purnea

Chaïbia (prononcîz Chaybiya), c' est li ptit no, et l' no d' årtisse da Chaïbia Tallal, ene pondeuse nayive marokinne. Elle a skepyî a Tnine Chtouka, el province d' El Djadida e 1929, et mori d' ene atake å cour li 2 d' avri 2004 a Casablanca.

Elle a cmincî a dessiner avou ses doets so des cårtons, sins mostrer ses dessins a nolu. Si fi a volou aprinde po-z esse pondeu. Adon, ele lyi a atchté des brouxhes et des pinceas.

On bea djoû, si fi a priyî a marinde on fén cnoxheu des pinteures. C' est l' prumî côp ki Chaybiya oiza mostrer ses dessinaedjes. L' ome a stî (a bon) reyusse et fé martchî avou leye po ponde des vraiyès toeles po ene espozicion å Göthe Institut a Cazablanca e 1966. Did la, elle a stî cnoxhowe long et lådje et do côp après, fé èn ôte mostra å Musée d' Art Moderne a Paris.

Ses ouves ont stî espôzêyes dis bråmint des payis d' Urope (France, Almagne, Daenmåtche, Bas-Payis, Swisse, Beldjike) et del Mîtrinne Mer (Marok, Grece, Catalogne, Eibiza, Tunizeye, Espagne, Grece) et minme pus lon: Irak, Braezi, Cuba ey Estats-Unis; mins c' est copurade el France ey å Marok k' i gn a-st avou l' pus d' espôzucions avou ses tåvleas.

Chaïbia esteut foirt avnante et amiståve, et todi gaiye, et nén grandiveuse po on sô, minme cwand ele divna li chouchoute des raploûs årtistikes des pus spepieus pondeus.

Dessin k' on dit a l' efant dessineu : "Vouss fé del Chaybiya" ?

Chaybia est loukeye come èn egzimpe d' årtisse-pondeu k' a-st arivé al copete del schåle sins måy aveur shuvou on cour di dessin, u aler tchabårer addé on grand mwaisse d' ene sicole di pinteure.

Co dins les anêyes 2000, e Marok, cwand on voet ene feye ki pond sins aveur aprin, on lyi dit: "To vous fé del Chaybiya !"