JVS Quasar
From Wikipedia
Deze pagina is genomineerd vo verwidderienge
Dit artikel is genomineerd omdat 't (nog) nie geschikt is as Wikipedia-artikel. Vo mêer informoasje zie de verwidderlieste.
- Dit artikel es geschreevn in 't Ostends, en da zoe zôo moet'n bluuvn.
JVS Quasar is de Ostensche afdelienge van de JVS, de joengerenvrênigienge voe sterrenkunde. JVS Quasar groepeert joenge gast'n die en interesse en in sterrekunde en weet'nschap in 't algemêen.
JVS stoat voe JongerenVereniging voor Sterrenkunde. Olle JVS-kern zin officieel erkend en moak'n deel uut van de overkoepelende VVS, Vereniging Voor Sterrenkunde.
[bewerk'n] Geschiedenisse
De verste voorloper van Quasar is in 1969 upgericht in 't lycée van Ostende deur André Annys en ee poar moaten oender de name OAAR (gin mens die wit voe wat dat da stoat). Doamee is Quasar de oedste nog bestoande sterrenkundige joengerenwerkieng van Vloanderen mo da wordt nie erkend deur de die van Limburg, JVS Descartes. De vergoaderiengen werden gedoan bie de ledn tuus, en ton da ze ee lokoal kregen in de Wittenunnestroate in Ostende werd de name veranderd in Aquarius. Al vroeg werd de verènigienge actief in de amateursterrenkunde in Vloanderen als afdèlienge van de Vereniging Voor Sterrenkunde (VVS). De specialiteiten van de verènigienge int begun was 't kieken no satellietn en pakken van fotos van de sterrn. Ton dat in 1972 de Jongerenvereniging Voor Sterrenkunde upgericht werd stoeg Aquarius up den èèste reke voe doaran mee te doen. In 1976 werd der gekozen voe ee naamsveranderienge omdat der regelmoatig menschen informoasje kwamen vragen voe aquariums. Ook kwam ter ee hèèle nieuwe generoasje ledn an die veranderienge van beleid wildn. De nieuwe name, Quasar, was geboorn. In dien tied was JVS Quasar verbroederd met JVS Pallas uut Mecheln, woada oender andere Frank Deboosere in zat. De werkienge van Quasar gieng joaren goed verder toe da ze in 1986 oorden da ze in 1987 uut under lokoal gezet giengen worden om dat et afgesmeten zoe worden. In 1987 werd der veruusd nor ee lokaal up den oek van de Schildersstroate en de Stèènbakkersstroate boven een elektriekkot. Da lokaal, dat eigendom was van Electrabel (tonne nog den EBES), was doavooren ee vrouwenuus. In die periode werd der alle joare no de Provence up kamp gegoan omda je doar assan goe weer et en tis doa snachts stief doenker, wat dat dus ideaal is voe no de sterren te kieken. Ook in de joaren '80 woaren der ee poar crisismomenten woadat 't aantal leden serieus winnig werd. Gelukkig et JVS Quasar dat allemolle overleefd en met de komst van ee nieuwe generoasje in den twiden elft van de joaren '90 werden der nieuwe plannen gemakt. Der zoet een astronomische beurze georgaiseerd worden in duin en zee. Azo was ter up 20 en 21 februoari 1999 de millennium astrobeurs, de grotste sterrenkundige beurze van België. 't brein achter die beurze was Patrick Jaecques, die eigenlijk ook al 't werk van den organisoasje gedoan et. Achter die beurze begosten de lokaalproblèmen upnieuw de kop up te steken. 't lokaaltje an de schildersstroate zoe verkocht worden en JVS Quasar zoet upnieuw moeten uutkieken voer etwad anders te kriegen. Gelukkig werd der gemakkeluk ee nieuw lokoal gevoenden in de vroegere Albertschole, in d'Ooststroate, eigenlijk nie verre van 't èèste lokaal da in de Wittenunnestroate in 2006 nog assan stoat te verkrottn. In de zomer van 2004 werd der veruusd not nieuwe lokoal woada tegenwoordig nog assan de werkienge gebeurt.
[bewerk'n] Werkienge
Van da gedacht kommen de Quasarianen alle vriedage tegoare in under lokaal in d'oede Albertschole, Ooststroate 29 in Ostende.
De vergoaderiengen begunnen ten achten en deuren toe ten tienen oaf snoavends. Normaal gezien wordt der begost met de roendvrage woada ze kunnen vertelln wat dat der gebeurd is up sterrenkundig en verênegiengsvlak in de passede weke. Da deurt mêestal toe kart vo de neegn.
Tonne is ter ee kartje pause woarachter dat der vodder gegoan wordt met den sterrenkundigen activiteit. Da's meestal êen van de ledn die ee klaptje komt doen over etwad sterrenkundigs. Mo tkut ook zien dat der ee kir etwien van buuten de verênigienge komt klappen, of dat der ee Quiz gegeven wort of ee film.
Achter ten tienen oaf pekken de leden mêestal toe 't gat in de nacht, of ost helder is goan ze no buten no de sterren en andere dienges gon kieken.
Doaneffest ister ook assan in de zomer e kamp woadawe ee weke nor etwoaschen goan woada je gin last et van te vele luchten en dajje dus mêer kunt zien. JVS Quasar doet dus ook mee an d'activiteitn van de JVS woada we tegoare met collega's uut Brugge (JVS Vigilia) de Westvlamsche ere kommen oog oedn.
