Jacob van Maerlant
From Wikipedia
Jacob Van Maerlant (ca. 1230-1293) wos nen Vloamschn schrivver die schreef inde volkstoale. Ie it zuk en kart miljoen verz’n vant Latien na 't Diets vertoald.
[bewerk'n] Leevn
Jacob van Maerlant wos ergens rond 1230 geboorn in de streke van Brugge en em weunde in Damme, in dien tid de vôorhoavn van Brugge. Da woarn ton vree rikke steed’n woarda ter vele an handel werd gedoan. Je studeerde ande Sint-Donoaskapitelschole en hoalde z’n bronn’n ut d’abdien Ter Duinen en Ter Doest.
In 1260 estem na na Zêeland gegoan vo der in plekske Maerlant (bie den Briel) koster te komm’n. Doar begoest ie te schrivvn; voorol ridderromans vo rikke Zêeuwsche adelikk’n. Je schreef er Alexanders Geesten, nen boek (helegans in verzen) over 't leevn van Alexander de Grote, De Historie van den Grale / Merlijns boec, over keuning Artur, en ôok de Istory van Troyen, over den Trojaanschn oorlog en de zwerftocht’n van Aeneas.
Rond 1270 kêerde em were na Damme en dor schreef em zin bekendste werk’n:
- Der naturen bloeme (1270); e verzoamelinge van 13 boek’n over plant’n, diern en andere miensnrassn. Als bron gebrukte em iervo 'De natura rerum' van Thomas van Cantimpré.
- Den Rijmbijbel (1271); e vertellinge vande bijbelsche geschiedenisse. De geestelikk’n woarn der int begun teegn omda et inde volkstoale geschreevn wos en da ezo iederêen den bijbel koest leezn.
- De Spieghel historiael (1285); z’n grôotste werk woarin da de hille geschiedenisse tot an den êerstn kruustocht verteld werd. Da werk bestoend uut mêer dan 90 000 verzen!
Jes verzekers gestorvn in 1293 in Damme. Na z’n dôod kend’n z’n werk’n e heruplevinge in 19de eeuw bist de Vlamsche bewegienge. In 1997 èn onderzoekers gezeid da Van neghen den besten, de beschrivvinge van 9 held’n ut de geschiedenisse, ôok van den and van Jacob van Maerlant zin. Da zo ton zin latste wirk moen gewist zin want Van neghen den besten es geschreevn achter 1291. Mo over da werk zin ze nog nie hil zeker.
Up de mart van Damme, vôo 't staduus, stoat er n stanbild van em.
