Izerbedevoart
From Wikipedia
Den Izerbedevoart is e bedevoart die de gesneuvelde Vlamsche soldoat'n van d'n Ièrst'n Weireldoërloh ('14 - '18) erdenkt.
[bewerk'n] Geschiedenisse
- De bedevoart is begun in 1920 in Koaskerke (Diksmude) en bestoat oek nu nog. De Vlams-Nationalist'n oud'n de erinnering van de Frontbewehing in leven: Nooit Meer Oorlog, Zelfbestuur en Godsvrede (het fameuze Izertestament). Anders gezeid: Gèn oërloh ne mi, e zelfstandig Vloanderen en soamenwerkinge tusschen olle Vloaming'n - wuk da nunder strekking oek is.
- Acht joar loater stoeg den Izertoërn der.
- De miserie behoste in d'n Twèd'n Weireldôorlog (1940-1945). Vele Vlams-Nationalist'n deejn mèj mèt'n Duts. Sommigte woar'n overtugd da ze mè de Nazi's eindelijk en oenofankelik Vloandern ging krieg'n. Andere woar'n mèjlopers of woar'n opgestok'n (deur de kerke, bievôorbeeld). Nog andere moes'n ni weet'n van Nazi-Dutsland. Moar achter d'n Oèrlog zat het spel op de woagn: ol de Vlams-Nationalist'n, zoender utzoendering, woar'n bekeken voe collaborateurs. D'n Izeboedevoart krièg va toen of oek e 'zwort' kantje.
- In 1946 wierd d'n Izertoërn opgebloazen. De doader ezee nôojt gevoen.
- In de jaren '80 kwam'n d'r mjèr en mjèr neo-nazi's na d'n toërn. Dedie add'n dudelik gèn bôodschap an "Nooit Meer Oorlog". 't Stoat pertank in verschillige toal'n op 'n tôorn geschrev'n.
- 't Izerbedevoartcomité oender leiding van voerol Lionel Vandenberghe wilde mjèr vôk trekken. Ze vertoald'n 't Izertestament na Vrede, Vrijheid en Verdraagzaamheid en stichende e museum. De Vloaming'n va de rechtervleugel, voerol Vlaams Blok (nu Vlaams Belang) en een djèl van de Volksunie (nu opgedjèld in Spirit en N-VA), wos nie 't akkôord mè Vandenberghe.
- Dieptepunt kwam in 1996 toe ze vocht'n op de wieje. Vele bedevoarders wez'n in de richting van 't Vlaams Blok.
- Sedert 2003 et de rechtervleugel een eigen 'bedevoart', noamelik de Izerwoake.
