Türkmenlerde wagt aňladylyşy
From Wikipedia
Daňdan wagty — Günüň dogjak ýeriniň ýagtylyp başlamagy.
Saba, säher wagty, ir ertir — Daň atandan gün dogýança. Tomus aýlarynda ol bir ýarym sagatlap dowam edýär.
Ertir wagty — Daň atandan Gün dogup, gowy ýerden saýlnýança. Şeýle hem ertir sözüniň geljek, indiki gün manysy hem bar. Mysal üçin, „bu gün bolmaz, ertir gel“ ýa-da „Ertirimizi (geljegimizi) göz öňünde tutsak“.
Salkyn — Bir gündiziň ýarsy. Mysal üçin, „Bu işi bir salkynda etse bolar“
Ertir salkyn — Gündiziň birinji ýarymy. Gün dogandan günortana çenli dowam edýär.
Öýlän salkyn — Gündiziň ikinji ýarymy. Günortandan ýarym sagat çemesi geçensoň başlanyp, gün ikindi bolýança dowam edýär.
Guşluk — Tomus günleri sagat 9 töweregi
Uly guşluk — Tomus günleri sagat 11 töweregi.
Günortan, günorta, çäş wagty, günorta garaňkysy — Günüň iň ýokary galýan wagty. Günortandan soň gün aşak inip ugraýar. Mysal üçin „Günorta boldy“, „Çarşenbe gün çäş wagty“.
Öýlän — Günortandan ýarym sagat çemesi geçenden soň başlanýar.
Ir öýlän — Günortan geçenden soň öýläniň giren ilkinji pursatlary.
Ak öýlän — Ir öýleden soň öýle guşluga çenli.
Öýle guşluk — Ak öýländen soň ikindä çenli.
Ikindi — Ýaşmasy golaýlan günüň reňkiniň üýtgäp gyzaryp başlaýan wagty. Ikindi girende her bir zadyň kölegesi öz boýunyň iki essesine günortanky kölegesiniň boýuny goşanyňdaky uzynlyga ýetýär.
Agşam — Gün ýaşan badyna agşam girýär we garaňky gatlyşýança dowam edýär.
Ir agşam, ilkagşam — Agşamyň ilkinji pursatlary. Ýaşan günüň ýagtysy solýança dowam edýär.
Giç agşam — Ýaşan günüň ýagtysy ýiteňkirläp, şapak doly ýitinçä, asmanda görünýän ýyldyzlar sanardan has köpelýänçä dowam edýär.
Ýassy — Agşamdan soň ýassy namazynyň okalýan wagty girende başlanýar.
Ýary gije — Gijäniň ýarpysynyň geçmegi. Gije umumy ikä bölünip, ýary gijeden öň we ýary gijeden soň diýlip hem atlandyrylýar.
[edit] Türkmenbaşy eýýamynda wagt aňladylyş reformasy
Aý atlary
| Iňlisçe | TSSR görnüşi | Türkmenbaşy eýýamynda |
| January | Ýanwar | Türkmenbaşy aý |
| February | Fewral | Baýdak aý |
| March | Mart | Nowruz aý |
| April | Aprel | Gurbansoltan aý |
| May | Maý | Magtymguly aý |
| June | Iýun | Oguzhan aý |
| July | Iýul | Gorkut aý |
| August | Awgust | Alp Arslan aý |
| September | Sentýabr | Ruhnama aý |
| October | Oktýabr | Garaşsyzlyk aý |
| November | Noýabr | Sanjar aý |
| December | Dekabr | Bitaraplyk aý |
Hepdäniň günleri
| Iňlisçe | Parsça-Türkmençe görnüşi | Türkmenbaşy eýýamynda |
| Monday | Duşenbe | Başgün |
| Tuesday | Sişenbe | Ýaşgün |
| Wednesday | Çarşenbe | Hoşgün |
| Thursday | Penşenbe | Sogapgün |
| Friday | Anna | Annagün |
| Saturday | Şenbe | Ruhgün |
| Sunday | Ýekşenbe | Dynçgün |
