Aqüariofilia

Un article de Wikipèdia, l'enciclopèdia liura.

L'aqüariofilia es una passion que consistís a far viure de peisses dins un aqüari en reconstituent lo mai fidèlament possible lor mitan de vida (biotòp). Existís de mantun biotòp diferent. Cada biotòp es caracterisat per sa qualitat d'aiga (pH, KH, GH, densitat en aiga de mar...), sas espècias de peisses e de plantas. Conven doncas de pas mesclar d'espècias eissidas de biotòps de caracteristicas aluènhadas.

Cossí començar l'aqüariofilia?

[Modificar] Quin volum ?

Aconselhi de començar amb un 100 litres minimum. Mai lo bac es pichon, mai es de mal entretenir : mai d'algas, mai de malautiás, una igièna mens bona... Fin finala : pas de pichon bac ! E sustot, pas de bocal per peisses roges. Los peisses son condemnats a tornejar durant tota lor vida, dins un volum tot pichon !

[Modificar] Causida del material

Prendre un o dos neons segon lo volum. Un calfatge es obligatòri per la màger part de las espècias d'aiga doça, e tanben, evidentament, un filtre. Utilisatz de ceramicas per lotjar las bacterias que degradaràn la pollucion organica, una mossa e un filtratge sus carbon actiu que cal cambiar regularament, senon las toxinas qu’aurà absorbit seràn totas regetadas dins l’aiga de l'aqüari. De preferéncia causir un filtre inclús e non pas un amb de ventosas. Los bulladors pòdon far un polit efècte, atencion çaquelà que pòdon far montar lo pH. Remplaçatz-los puslèu per un difusaire de gas carbonic, que fa créisser las plantas e demenir las algas. Prenètz tanben un salabre, de tèsts NO2 (nitrits) e pH, de bacterias e un produch per condicionar l'aiga del robinet. Mai tard deuretz comprar qualques produches anti-parasits dins un bon magazin perque las malautiás tardaràn pas d'arribar...

[Modificar] Las decoracions

Los objèctes de decoracion son pas obligatòris ; podètz prendre un objècte en plastic dins una animalariá (exèmple : un pichon ponton en plastic o en resina, una pèira...). Obligatòria se prenètz un peis netejaire, una rasic. N’i a de magnificas en magazin, totas torçudas. Aquò balha vida al bac. Los netejaires n’an besonh per viure. Es segur çò que fa lo mai polit coma objècte de deco !

[Modificar] Lo sòl

Cal de substrat especial per las plantas, e de sabla. Causissètz plan vòstra sabla, es ela que balha l'ambient a vòstre aqüari. Una sabla de Lèger a de tons cauds, aquò balha un ambient iranjat. Una sabla blanca brilhanta balha un ambient mai fred, l'aiga pareis mai transparenta, e de peisses de las colors vivas s'assortiràn plan dessús.

[Modificar] L'installacion

Versatz vòstre substrat dins lo bac. Metètz un pauc d'aiga dessús per que siá pas mai en podra, mas un pauc coma una pasta. Egalisatz-la pertot. Fasètz parièr amb la sabla. Plantatz las plantas. Doblidetz pas las règlas : las grandas darrièr, las mejanas al mièg, e las pichonas davant ! Plaçatz los decòrs. S'avètz de mossa de Java, ligatz-la a la rasic amb de fial de nilon. Metètz una sieta al fons de l'aqüari. Versatz l'aiga dessús, e emplissètz lo bac. Esperatz tres setmanas abans de metre los peisses, e metètz regularament de bacterias e de fertilisant liquid per plantas. Fasètz de tèsts de nitrits e pH totas las setmanas per seguir l’evolucion... Quand metètz vòstres peisses los nitrits devon èstre a 0.

[Modificar] Las plantas

Son indispensablas ! E magnificas ! Compratz-ne puslèu de creissença rapida per començar, evitaràn d'aver d’algas. Lor cal de fertilisant liquid (prevesètz un grand flacon, s’usa lèu...) e en opcion, pas obligatòri mas extrèmament util, un distributor de CO2. Podètz tanben lo fabricar. Doblidetz pas de daissar un grand espaci liure per la nada dels peisses. La florison es sovent possibla, e se vos agradan las plantas, perqué vos lançar pas dins la fabricacion d'un aqüari olandés, ont las plantas comptan mai que los peisses ?

[Modificar] Los peisses

Començatz amb de vivipars. Los vivipars fan pas d'uòus : lors pichons se desvolopan dins lo ventre de la maire, doncas riscan pas tant de se far manjar... Los peisses perfièches per començar ! Los guppys son de segur los mai risolièrs : los mascles ensajan de contunh de s'acoblar.