Mèrvelle
From Wikipedia
|
Ch't' articl'ye fut c'menchie en Jèrriais
 |
Eune mèrvelle est un fricot d'Jèrri. Ch'est eune manniéthe dé noeud en pâte tch'est fricachi. À Saint Ouën, nou soulait app'ler les mèrvelles des parahouettes mais chu vièr nom est hors achteu. Au temps pâssé, nou mangeait des mèrvelles pustôt à Pâques, mais au jour d'aniet i' sont populaithes ès fêtes et nou les mange toute l'année.
[amendaer] L'èrchette
L'èrchette est coumme chennechîn:
- deux livres dé flieu
- un quart'ron dé chucre
- un démié-livre dé beurre
- huit oeux
D'battez l's oeux dans eune bolle. Dans eune aut' bolle, craînchiz la flieu et mêlez l'chucre et l'beurre là d'dans. Vèrsez-y l's oeux à seule fîn d'faithe eune pâte.
Prannez des pouongnies d'pâte et rouôlez-les pouor en faithe des balles. Rouôlez les balles dé pâte et copez des creux dans châque ronde. Épis i' faut touônnez les mèrvelles – prannez un but d'la ronde et halez l'but par lé creux. Fricachiz les mèrvelles dans dé l'hielle (ou d'la molle graîsse).
[amendaer] Des couôteunmes
S'lon cèrtains, i' faut faithe les mèrvelles duthant lé r'tithant d'la mé. S'lon d'aut's, ch'est l'montant d'la mé tchi gouvèrne la faîs'sie d'mèrvelles.
Y'en a tchi font eune cope dans châque ronde dé pâte; y'en a d'aut's tchi font deux copes.
Nou soulait r'citer une vielle arrînmée en faîthant des mèrvelles:
- Mèrvelle, mèrvelle,
- Vînt à l'us -
- Auve quat' têtes
- Et quat' tchus!
