Châté Lîzabé
From Wikipedia
|
Ch't' articl'ye fut c'menchie en Jèrriais
 |
Lé Châté Lîzabé est un châté en Jèrri, dans la Baie d'la Ville à Saint Hélyi.
Nou rêalisit au seizième siècl'ye tch'i'n' 'tait pus pôssibl'ye dé protégi l'Vièr Châté contre les canons. La p'tite Ville dé Saint Hélyi avait grandi et 'tait à chu temps là l'siège d's Êtats et du conmèrce ouaithe qu'i' n'y'eûsse pon d'cauchie. Nou décidit qu'i ' 'tait nécessaithe dé bâti un nouvieau châté dans la Baie d'la Ville sus l'Islet. L'Abbaye d'Saint Hélyi tch'avait 'té là avait 'té freunmée à la R'formâtion auprès bein d's années sus l'pus. Lé travas d'la fortificâtion du rotchi c'menchit duthant la règne du Rouai Douard VI en 1550, mais la bâtithie du châté lî-même fut entreprînse pus tard souos la Reine Lîzabé I. Ch'fut l'Gouvèrneux, Messire Walter Raleigh, tchi lî donnit san nom du Châté Lîzabé (en Angliais: Elizabeth Castle).
Lé Châté dêv'loppit et d'vînt pus grand d'vant la Dgèrre Civile Angliaîche au dgiêx-septième siècl'ye. Lé Prînce Charles y d'meuthit duthant s'n exil en Jèrri. Mais la destruction d'l'églyise d'l'Abbaye au tchoeu du Châté tchi fut soûffliée par un mortchi lanchi du Mont d'la Ville forchit les Rouoyalistes dans l'Châté d'lus rendre viyant qu'l'églyise avait 'té faite sèrvi coumme un stôrre pouor lé mangi les les meunitions. Les bâtisses du Châté fûtent èrbâtis auprès la Dgèrre et duthant la preunmié maintchi du dgiêx-huitième siècl'ye nou-s'y construisit des bèrrexes pouor l's officièrs et les soudards. Lé Châté Lîzabé est entouothé par la mé pouor sept heuthes sus douze, et ouaithe qué ch'sait eune d'fense ch'est eune faiblièche étout viyant qu'les troupes n'étaient pon capabl'yes dé d'fendre la Ville quand l'Pont 'tait couvèrt par la mé.
Des soudards y d'meuthaient jusqu'à 1923 quand l'Châté fut vendu ès Êtats comme monûment historique - mais l's Allémands ajouôtîtent des fortificâtions duthant l'Otchupâtion.
Achteu ch'est un musée mênagi par l'Héthitage dé Jèrri.
