Dyreidrett

Frå Wikipedia – det frie oppslagsverket

Dyreidrett er idrett som vert utført av menneske saman med dyr, eller av dyr åleine. Slike idrettar har vore populære sidan oldtida, og fleire dyrerasar er ala fram spesielt for å kunne konkurrera, til dømes i å springa fort eller slåst. Særleg hundar og hestar blir brukte til slike idrettar.

[endre] Løp

Å sjå fart, kven som er raskast, og gjerne vedda om det, har fascinert menneske i årtusen. Ettersom mange dyr spring raskare enn menneske, har ein funne opp fleire idrettsgreiner der dei kan konkurrera mot kvarandre. Ein finn løp med hundar, hestar og kamelar med eller utan sleder, vogner eller ryttarar som konkurrerer med kvarandre. Raske dyr vert verdsette og brukt i avl, dyr som taper vert ofte slakta.

Døme:

• Hundekøyring
• Travsport

[endre] Slosting

Frå store og mektige til små og iltre skapningar har menneske vore fascinerte av å sjå dei slost mot kvarandre. I mange tilfelle har ein teke ein art der hannane slost om dominansen, sleppt dei saman og ofte lete dei slost til ein av dei døyr, som med kamphanar og kampfisk. I andre har ein forvirra eller såra dyr slik at dei blir aggressive. Dette har òg vore kombinert med slosting mot menneske, i tidlegare tider i gladiatorkampar og i moderne tider i tyrefekting.

Jakt er truleg forløparen for mange slike typar dyrekamp, og kan i seg sjølv vera ein idrett der menneske eller dyr slost med andre dyr. Dette gjeld i mindre grad for fiske.

[endre] Evner

Ei mindre blodig form for dyreidrett er dei greinene der ein prøver kor flinke dyra er til ein visse ting, til dømes til å gjeta sauer eller hoppa over hinder. Mange av desse idrettane er relativt nye, og er ofte komne til som følge av at ein ønsker å bruka dyr til sport utan at dei tek skade av det.

Døme:

• Sprangriding
• Sauegjeting
• Agility