Cora Sandel

Frå Wikipedia – det frie oppslagsverket

Cora Sandel er eit psevdonym for den norske forfattaren Sara Fabricius (20. desember 1880, død 1974).

Innhaldsliste

1 Livssoge
2 Diktverk
- 2.1 Omsetjingar
- 2.2 Prisar og utmerkingar
3 Bibliografi
4 Meir å lese om Cora Sandel
5 På verdsveven
6 Kjelder

[endre] Livssoge

Ho vart fødd i Kristiania (Oslo). Familien flytta til Tromsø då ho var 12 og ho vaks opp der. Ho budde så mange år i Frankrike, før ho flytta til Sverige i 1921, og budde der i mange år. Ho var ein norsk forfattar som levde det meste av livet sitt utanlands, i Frankrike og i Sverige.

I unge år prøvde Fabricius å etablera seg som kunstnar. I eit år gjekk ho på målarskule hjå Harriet Backer i Oslo, men då mor hennar døydde i 1903 måtte ho reise attende til Tromsø for å ta seg av småsyskjena sine. 25 år gamal drog ho igjen ut for å gå på målarskule, denne gongen til Paris, og ho kom til å bu i Frankrike i 15 år. Under opphaldet i Frankrike byrja ho å skriva reiseskildringar og noveller, mange av dei vart publiserte i det radikale tidsskriftet Mot Dag. Målarvirket gav ho opp etter at første verdskrigen tok slutt, då hadde ho gifta seg og fått ein son.

Ho debuterte som forfattar då ho var 46 år, i samband med skilsmålet frå mannen, den svenske skulptøren Anders Jönsson. Alberte og Jakob (1926) vart den fyrste i ein trilogi med delvis sjølvbiografiske romanar. Saman med Alberte og friheten (1931) og Bare Alberte (1939) var dette hennar store litterære verk. Forfattarskapet hennar besto elles mykje av noveller, i tillegg til romanane Kranes Konditori og Kjøp ikke Dondi.

På tross av stor litterær suksess skjulte Fabricius seg bak psevdonymet sitt og levde eit ganske tilbaketrekt liv.

[endre] Diktverk

Cora Sandel brukte fleire element frå sitt eige liv i forteljingane ho skriv. Ho tok særleg opp korleis maktpersonar gjerne overkjørte barn og unge, og viste særleg eldre kvinner som dei som haldt yngre kvinner nede.

[endre] Omsetjingar

Alle bøkene hennar vart også utgitt på svensk ganske parallelt med dei norske versjonane. I tillegg har dei vorte omsette til mellom anna dansk, finsk, engelsk, nederlandsk, russisk, italiensk og tysk.