Habenhusen
From Wikipedia
Habenhusen mit Ton up dat „a“ („Håbenhusen“) is en Oortsdeel vun den Stadtdeel Övervieland an den Rand vun Bremen-Süd.
Bit 1945 höör Habenhusen to dat Landgebiet vun Bremen un wurr vun 'n Landherrenamt in de Stadt regeert. Nah de Tiet vun’n Natschonalsozialismus keem Habenhusen denn to de Stadt Bremen.
Inholtsverteken |
[Ännern] Vergohn Tiet
Bit in dat 19. Johrhunnert weer Habenhusen een Buurndorp, loter leeften dor meistendeels Arbeiders un Strotenmokers. To Pingsten 1911 hett dat een' groten Brand in 't Dörp geben. Dor sund wecke vun de gröttsten Buurnhüser afbrennt. De meisten wurrn later woller upboot. Noh den Eersten Weltkrieg keemen veel Lüe ut de Stadtdelen vun de Arbeiders in Bremen na Habenhusen: Dor wurrn „Siedlungen“ boot. Tolest hefft se to de Tiet vun 'n Natschonalsozialismus ok noch een Siedlung hensett, dor hefft se denn SA-Lüe un jem ehre Fomilien henstüert in dat rode Hobenhusen, wo de meisten Inwahners dat mit de SPD holen döen.
[Ännern] Hüdigendags
Siet 1974 is in Habenhusen denn de moderne Städteboo in Gang ween. Een Stroot noh de annere hefft se vullboot mit Een-Fomilien-Hüser. In düsse Tiet hett sik dat Leben in Habenhusen natürlich duchtig verännert. Vundaag is Habenhusen in den Sozialindex vun de Stadt Bremen ganz baben upföhrt. Habenhusen is een vun de veer Ortsdelen (vun mehr as 80, de dor upföhrt sund) mit dat höögste Inkamen un de ringsten sozialen Problemen. In Habenhusen gifft dat een Grundschool un een School vun de Sekundorstufe I, de weert ünnerholen vun dat Land Bremen, dorto noch een private Grundschool un private School mit Sekundorstufe I un II. Düsse Privootschool is de „Freie Evangelische Bekenntnisschule“.
[Ännern] Inwohners
1812 leven in Habenhusen 402 Inwohners; 1855: 639 Inwohners; 1885: 857 Inwohners; 1905: 3.169 Inwohners; 1955: 4.164 Inwohners; 1974: 3.433 Inwohners; 1995: 8.381 Inwohners.
[Ännern] Karken
Twee Karken sund in Habenhusen tohuse, ofschoonst de Habenhuser Johrhunnerte lang jümmers noh Arsten noh Karken gohn sund. 1995 hett de Evangelische Gemeende Arsten un Habenhusen de Simon-Petrus-Karken boon loten. Dor gifft dat een Toorn mit een Klockenspeel vun 18 Klocken to hören. In de Karken sund schöne Finster vun Hella Santarossa ut Berlin und annere Kunst vun Thomas Duttenhoefer ut Darmstadt. Een Orgel vun de Firma Späth ut de Swiez steiht dor ok in. Noh de Evangeelsche Gemeende höört um un bi 4100 Moten to.
Ungefähr to de sülbige Tiet hett de Evangeelsche Freekarken „Paulusgemeende“ dor in een olen, ümbooten Buurnhoff ehre Karken opmaakt. Düsse Gemeende höört to de Pingstkarken noh de Mühlheimer Richtung un kickt jümmers noh Amerika, wie man dat dor so maken deit, mit de Karken. No düsse Karken höört um un bi 600 Moten.
[Ännern] Wat süß noch wichtig is
In Habenhusen gifft dat ook een groot Gewerbegebiet, wo de Lüe allens inköpen köönt, wat se man bloß bruken doot in Boomarkt, Supermarkt, Autoverkoop un wat nich allens. Allerhand Firmen sünd dor ook tohuse. Twee Sportvereene gifft dat in Habenhusen: Den ATSV, dor worrt vör allen Handball speelt, un denn noch de Habenhuser FV, dat is een Footballvereen.
[Ännern] De Freden vun Habenhusen
In de Geschicht is Hobenhusen besunners, weil dor in dat Johr 1666 de Freden twüschen Bremen un Sweden sloten worrn is. Dat weer an’n 15. November. Dormols weer Sweden een vun de gröttsten un wichtigsten Länner vun de Welt. De General vun de Sweden weer Carl Gustav Wrangel, de laterhen in dat Johr 1675 den Krieg gegen den Kurfürsten vun Brannenborg verloren hett.
[Ännern] Böker öber Habenhusen
Hermann Frese: Habenhausen. Ein Streifzug durch neun Jahrhunderte, Bremen 1986, ISBN 3-920699-79-3
