Elsfleth

From Wikipedia

De Havenstadt Elsfleth liggt an de unnere Werser nördlich van de Huntemünn. Se hett 9200 Inwahners. Elsfleth is een van de öllsten Öörd an de Unnerwerser. Al de Bremer Bischop Ansgarius schall hier um 860 de eerste Kark grünnt hebben, To Tieden van de Stedinger weer Elsfleth de Middelpunkt van Noordstedingen un Versammlungsoort, wenn't um dat Slichten van Striet twüschen de Rüstringer Fresen un de Bremers gung

• 1350 keem Elsfleth unner de Herrschup van de Ollnborger Grafen.
• 1504 woor de St.-Nicolai-Kark boet,
• 1607 woor de eerste School in Elsfleth grünnt.
• 1624 enen groden Upswung nehm Elsfleth, as Graaf Anton Günther dat gegen dat Strüven van de Bremers fardig kreeg, dat hier de Wersertoll inricht woor un de Ollnborger Staatskass bit 1820 jedet Jahr bit to 120.000 Rieksdaler inbroch.
• 1809 an'n 7.August keem Herzog Friedrich Willem van Bruunswiek-Oels (de Swarte Hertog) na Elsfleth. He weer up de Flucht vör Napoleon un besteeg hier mit siene Lü em Schipp, dat em na England bringen schull. Up disse Begevenheit wiest vandagen noch dat Hertog-Oels- Denkmaal hen , dat up'n Raathuusplatz steiht.
• 1856 kreeg Elsfleth tosamen mit Braak un Varel de Stadtrechte.

De günstige Laag an de Münn van de Hunte in de Werser un de korte Weg bit na de Noordsee weern de Grund darför, dat Elsfleth veel mit de Schipperee un den Schippbo to doon harr. In't 19.Jahrhunnert weer Elsfleth mit Braak (Brake) tosamen de wichtigste Haven in dat Ollnborger Land. 22 Reedereen weern hier ansässig, för 100 Scheep weer Elsfleth de Heimathaven un up 8 Werften woorn Segelscheep boot.

1832 woor de Navigationsschool grünnt, ut de laterhen de Seefahrtschool Elsfleth entstund, de vandagen as Fackberiek Seefahrt en Deel van de Fackhoochschool Ollnborg/Oostfreesland/Willemshaven is.

1873 woor na dreejährige Botiet de Isenbahnstreck Hude-Elsfleth-Braak fardig. To glieker Tiet aver keem för de Weertschup in Elsfleth en Neddergang, wiel ümmer mehr Dampers boot woorn, un de Elsflether Werften sik nich to rechter Tiet van den Holtschippbo up den Isenschippbo umstellen de. Hento keem noch de Umstand, dat de Elsflether Haven bi de Werserkorrekschoon um 1890 van dat Hööftfahrwater aftrennt woor.

In de folgen Jahren versochen de Elsflethers den Schaden uttoglieken . Se grünnen ene Heringsfischeree-Sellschup, de veel Spood harr. 1958 woorn hier 65.000 Fatt Heringe anlannt, aver liekers muss se een paar Jahr later den Bedrief instellen. Vandagen besteiht ümmer noch de Elsflether Werft AG, de Scheep bit 8000 Ladetunnen boot. En anner Industrieunnernehmen is de Omni-Pac, ene Fabrik, de Verpackungskraam herstellt, to'n Bispill Eierverpackungen.