Разловечко востание

Од Википедија, слободна енциклопедија

Под влијание на херцеговското востание, а под раководство на Димитар Поп-Ѓеоргиев Беровски и на неговиот дедо Поп Стојан од село Разловци, бил направен план за востание во областа Пијанец, Малеш, Струмичко, Кочанско, Петричко и Мелничко. Според пишувањето на синот на Поп Стојан, Костадин Стојанов, селаните од Разловци го откупиле десетокот од турците за да не доаѓаат спаиите во селото и да не разберат за подготовките на востанието.

Оружјето било купено од Виница, Кочани, Солун и Ќустендил, а знамето било извезено од учителката баба Недела и Станислава Караиванова. На знамето пишувало: “Македонија-станете за слобода”. Во месец април главниот водач на востанието Димитар Беровски стигнал во колибата на Поп Стојан во месноста Калаџерџево, каде што било одржано првото советување и бил направен оперативен план за развиток на востанието. Подготовени за востание биле селаните од Разловци и Истевник од Пијанечко, Лаки во Кочанско (сега Виничко) и Митрашинци во Малешевско.

Димитар Поп-Ѓеоргиев Беровски со четата требало да ги обиколи селата во Пијанец, Малешевско, Радовишко, Струмичко, Петричко и Мелничко, со цел востанието да избие едновремено на целиот регион спрема Малешевските планини и Плачковица. Конкретно востанието прво требало да започне во Пијанец и да се ослободи главното место Царево Село (денес Делчево), потоа во Малешево со заеднички сили да се заземе Берово каде имало помалку Турски војници и на крајот заедно да се нападне главниот град во то а време на двете области, Пехчево, каде што било и седиштето на мудурлакот.

Околу 1-ви мај Димитар Беровски се вратил од посета на Калаџерџево, а на 7 мај се одржало второто советување на кое биле анализирани резултатите од подготовките и се дискутирало за тоа кога да почне борбата.

Но, додека се одржувало советувањето во селото Разловци ненадејно дошле Турци чиновници со вооржена придружба, уапсиле неколку селани, одредиле две девојки за потурчување и се заканиле дека ќе го запалат селото. Заговорениците помислиле дека планот за востанието е откриен и решиле веднаш да ја започнат борбата. На 8-ми мај ги нападнале чиновниците и нивната вооружена придружба и по неколку часовна борба го ослободиле селото. Востанието се проширило и во наредните села: Истевник, Лаки, Митрашинци и др.

Во текот на една недела востанието се разгорело, но со пристигнување на турската војска и башибозукот востанието било крваво задушено. Селаните кои не успеале да побегнат биле ѕверски убивани, оставани за пример на населението, а некои од селаните од реонот биле мачени како затвореници во Серес, Солун, Скопје и др.

Разловечката чета на чело со Димитар Поп-Ѓеоргиев Беровски успеала да се задржи и да ја продолжи борбата во Малешевските Планини, Пијанец, Осоговските Планини и во Кресна.

Оваа статија е никулец. Може да помогнете со нејзиното проширување.