ვახტანგ (ალმასხან) ბატონიშვილი
ვიკიპედიიდან
საკუთარ სახელს "ვახტანგ ბატონიშვილი" აქვს სხვა მნიშვნელობებიც. იხილეთ: ვახტანგ ბატონიშვილი |
ვახტანგ (ალმასხან) ბატონიშვილი (ბაგრატიონი), (* 22 ივნისი, 1761 ― † 28 ოქტომბერი, 1814, პეტერბურგი), ერეკლე II-ისა და დარეჯან დედოფლის ძე.
ლევან ბატონიშვილის გარდაცვალების შემდეგ საუფლისწულოდ მიიღო არაგვის საერისთავო, აქტიურად მონაწილეობდა კრწანისის ბრძოლაში. ტახტისათვის ატეხილ ბრძოლაში მხარს უჭერდა ძმებს იულონს და ფარნაოზს, ოპოზიციაში ედგა უფროს ძმას გიორგის. 1802 რუსთა წინააღმდეგ თავადაზნაურთა გამოსვლის პერიოდში რუსებმა შეიპყრეს და დარეჯან დედოალთან ერთად ავლაბრის სასახლეში დაატუსაღეს.
1803 წლის თებერვალში სამეფო სახლის სხვა წევრებთან ერთად პეტერბურგში გაასახლეს. დაკრძალულია ალექსანდრე ნეველის ეკლესიაში. განაახლა კანონმდებლობა არაგვის საერისთავოსათვის "განჩინება ბარისა და მთიურთა ადგილთა", ისტორიული თხზულება "ისტორიების აღწერა" და სხვა. ჩვენამდე მოაღწია აგრეთვე მისმა ეპისტოლურმა მემკვიდრეობამ.