Zhao Ziyang

From Wikipedia

Zhao Ziyang esis Chiniana politikisto. Il naskis ye 17 di novembro 1919 en Henan-provinco.

Evante 20 yari il koheris komunista partiso. Ye 1949 komunisti vinkis interna milito en Chinia, ed a Zhao donesis plu importanta standi. Dum kulturo-revoluciono di Mao Zedong en 1960a yari il esis forsata translojar a rural areo por “lernar de agrokultivisti”, ma ganis quik retroe sua stando en partiso.

Zhao divenis konocata en Chinia, kande il laboris kom partisestro en Sichuan. La provinco esis tre povra, ma Zhao fortigis l’ industrio ed l' agrokultivo dil areo. Il divenis vice-chefministro ye aprilo 1980 e chefministro kin monati pose. Dum sep yari il duktis signifikanta novigi en ekonomio.

Ye 1987 Zhao nominesis kom prezidanto dil partiso pos suplantita Hu Yaobang. Tamen dum nexta yaro inflaciono diminutis lua favoro. La regresiva partisestri decidis suplantar Zhao, kande il opozis sangoza represo dil studento-movemento en la Placo di Cielala Paco (Tianmen-placo) ye nokto inter 3ma e 4ma di junio 1989. Pos la suplanto Zhao divenis ne-existanto en Chinia.

Laste Zhao Ziyang videsis publike ye 19 di mayo 1989. Il esis en hemal aresto en Beijing til sua morto. Il mortis ye 17 di januaro 2005.