Manila

From Wikipedia

Para iti dadduma pay a kaipapanan wenno artikulo maipapan iti Manila, kitaen ti Manila (panangilawlawag).

**Ciudad ti Manila**

Pakasarakan
Mapa ti Metro Manila a mangipakita iti Ciudad ti Manila
Govierno
Rehion:	Nailian a Capitolio a Rehion (National Capital Region) (NCR)
Provincia:	Awanan provincia
Distrito:	Umuna ken Maika-6 a distritos ti Manila
Barangay:	897
Klase ti sapul:	Primera clase a ciudad
Mayor:	Jose L. Atienza, Jr.
Panag-ciudad:	Junio 10, 1574
Pisikal a pakabigbigan
Kalawa:	38.55 km²
Populasion: Total (2000) Densidad:	1,581,082 41,014/km²
Nagsasabtan	14°35' N 121° E

Ti Roxas Boulevard iti Manila nga am-ammo kas "Baywalk"

Ti Ciudad ti Manila (Tagalog: Maynila) ket ti ciudad a capitolio ti Filipinas. Masarakan ti ciudad iti akindaya a playa ti Manila Bay iti akinlaud a paset ti Luzon, iti sungaban ti Karayan Pasig. Kabeddeng ti Manila dagiti ciudad ken il-ili iti Metro Manila, ti Navotas ken Ciudad ti Caloocan iti amianan, Ciudad ti Quezon iti amianan-a-daya, San Juan ken Ciudad ti Mandaluyong iti daya, Ciudad ti Makati iti abagatan-a-daya, ken Ciudad ti Pasay iti abagatan.

Nagtaud iti "may nilad", Tagalog ti "addaan nilad" ti nagan ti Manila, a mangdakdakamat iti maysa a kita ti natayag a ruot nga agtubtubo idi iti ig-igid ti bay. Idi maika-16 a siglo, nabukel ti "Maynilad" manipud iti komunidad dagiti Muslim iti ig-igid ti Karayan Pasig a kas centro ti kolonial a govierno ti Espania idi inturayanna ti Filipinas iti nasurok a tallo a siglo.

Idi katengngaan ti maika-16 a siglo, ti lugar ti agdama a Manila ket iturturayan ti tallo a rajah wenno daulo ti Muslim a komunidad. Isuda da Rajah Sulayman ken Rajah Matanda a mangiturturay kadagiti komunidad iti abagatan ti Karayan Pasig, ken ni Rajah Lakandula a mangidadaulo kadagiti komunidad iti amianan ti karayan. Ti Manila idi ti kaamiananan a sultanado iti arkipelago. Kaduana dagiti sultanado ti Brunei, Sulu, ken Ternate iti Cavite.

Idi 1570, maysa nga expedision dagiti Espaniol nga imbaon ni Miguel López de Legazpi ti nangballaag a parukmaenna ti Manila. Ti talkenna a buyot a ni Martín de Goiti ti dimteng iti Manila manipud iti Cebu a yan idi ti kuartel dagiti Espaniol. Pinadanon dagiti Muslim a Tagalog dagiti ganggannaet; ngem adda sabali a panggep ni Goiti, kaduana ti 300 a soldadosna, rinautda ti Manila ket darasda a pinarmek dagiti nativo a komunidad. Dimteng ni Legazpi ket dagiti pasurotna iti sumaruno a tawen ket nakikappiada kadagiti tallo a rajah ket nangbukelda iti maysa a conseho ti ciudad nga addaan iti dua a mayor, 12 a konsehal, ken maysa a secretario. Kangrunaanna, nangaramidda iti napaderan a ciudad iti akin-abagatan nga igid ti Karayan Pasig tapno masaluadan ti pagtaengan ken kuartel dagiti Espaniol. Naawagan daytoy a napaderan a ciudad iti Intramuros.

Idi Junio 10, 1574, inikkan ni Ari Philip II ti Espania ti Manila iti titulo nga Insigne y Siempre Leal Ciudad ("Mabigbigbig ken Naynay a Napudno a Ciudad"). Idi 1595, naideklara ti Manila a kas capitolio ti Filipinas ket nagbalin kas centro ti trans-Pacifico a comercio ti pirak.

Idi 1898, sinakup ti Estados Unidos ti arkipelago, agingga iti 1935. Kabayatan ti Maikadua a Gubat iti Sangalubongan, nadadael ti kaaduan a paset ti ciudad. Idi 1975, nabukel ti rehion a Metro Manila ket nairaman ti Ciudad ti Manila.

Iti igid ti Manila Bay iti sumipnget

[baliwan] Dagiti distrito

Nabennebenneg ti Manila iti 16 a heografikal a distritos. Maysa laeng a distrito ti saan a sigud nga ili, ti Port Area.

Dagiti 8 a distrito iti amianan ti Pasig ket ti Binondo, Quiapo, Sampaloc, San Miguel, San Nicolas, Santa Cruz, Santa Mesa, ken Tondo.

Ti sabali pay a walo a distritos ket ti Ermita, Intramuros, Malate, Paco, Pandacan, Port Area, San Andres Bukid, ken Santa Ana. Ti San Andres ket dati a parte ti Santa Ana, ken ti Santa Mesa ket sigud a paset ti Sampaloc.

Amin dagitoy a distrito, malaksid iti Port Area, ket addaanda kadagiti kabukbukodanda a simsimbaan. Ti distrito ti Binondo ket isu ti Chinatown ti ciudad. Ti Tondo ti yan dagiti marigrigat a residente, idinto a dagiti met distrito ti Ermita ken Malate ti ad-adda a nalatak kadagiti turista ta adda ditoy ti adu a panganan, paginuman, pagraragsakan, five-star nga otel, ken shopping malls.

Addaan ti ciudad iti 897 a barangay kadagiti 16 a distritona.

[baliwan] Silsilpo iti ruar

Dagiti Ciudad ken Ili ti Metro Manila
Dagiti Ciudad	Caloocan \| Las Piñas \| Makati \| Malabon \| Mandaluyong \| Manila \| Marikina \| Muntinlupa \| Parañaque \| Pasay \| Pasig \| Quezon \| Taguig \| Valenzuela
Dagiti Ili:	Navotas \| Pateros \| San Juan