Diosdado Banatao
From Wikipedia
Ni Diosdado Banatao (naipasngay idi Mayo 23, 1946 iti Bario Malabbac, Iguig, Cagayan iti Filipinas), ket maysa a nalatak nga enterpreneur ken inheniero elektrikal nga am-ammo iti industria ti kompiuter ken elektronika. Nakipagbangon isuna kadagiti nalatak ken dadakkel a kompania kas iti Mostron (agparpartuat iti PC motherboards), Chips and Technologies (agparpartuat iti PC chip sets nga idi agangay ket ginatang ti Intel), ken S3 (agparpartuat iti graphics chips, a nabaliwan ti naganana iti SonicBLUE).
Ni Banatao ti mabigbig a nangirubuat iti umuna a single-chip a graphical user interface (GUI) accelerator iti kompiuter. Maysa pay isuna a timmulong a nangpartuat iti controller chip ti Ethernet. Idi 1989, inyunana ti konsepto ti local bus iti personal computer ket idi 1990, ininawna ti kaunaan nga accelerator chip ti Windows.
Tinurpos ni Banatao ti B.S. Electrical Engineering iti Mapua Institute of Technology iti Filipinas, ken ti M.S. Electrical Engineering ken Computer Science iti Universidad ti Stanford.
