Netscape Navigator
De Wikipedia, le encyclopedia libere
Netscape Navigator, anque appellate simplemente Netscape, esseva un navigator web proprietari que esseva extrememente popular durante le annos 1990. Le termino de interlingua pro iste typo de software debe probabilemente su existentia a iste programma.
In le initio esseva le producto definitive de Netscape Communications Corporation e le navigator dominante in terminos de numero de usatores. Ma in 2002 quasi tote le mundo habeva gradualmente cambiate a Internet Explorer de Microsoft partialmente a causa del inclusion de iste programma in le systema de operation Windows.
Le cadita de Netscape esseva un componente central in litigation anti-cartel procedite contra Microsoft per le governamento statounitese, que habeva como resultato un judicamento que le inclusion de Internet Explorer con Windows sia un practica monopolistic illegal.
Le programma Netscape Navigator esseva succedite per le pacchetto integrate Netscape Communicator.
