Serbski institut
Z Wikipedije
Serbski institut z. t. ze sydłom w Budyšinje a z wotnožku w Choćebuzu wutwori so k 1. januarej 1992 wot Swobodneho stata Sakska zhromadnje z krajom Braniborska a kontinuuje dźěło Instituta za serbski ludospyt. Tutón bě so 1951 załožił a přisłušeše wot 1952 do 1991 Němskej akademiji wědomosćow (wot 1972: Akademiji wědomosćow NDR).
K nadawkam instituta słuša přepytowanje rěče, stawiznow a kultury Serbow w Hornjej a Delnjej Łužicy w zašłosći a přitomnosći. Integrowanej stej Serbski kulturny archiw a serbska centralna biblioteka.
W instituće přewjeduja so tež interdisciplinarne slědźenja wo aktualnym połoženju a wosebitosćach Łužiskich Serbow přirunujo z tamnymi małymi rěčemi a kulturami w Europje.
Serbski institut kooperuje z druhimi wědomostnymi zarjadnišćemi w tu- a wukraju. Jeho fachowcy spjelnjeja wučbne nadawki na uniwersitach a wysokich šulach. Kóžde druhe lěto wuhotuje institut mjezynarodny ferialny kurs za serbsku rěč a kulturu.
