Real Filharmonía de Galicia
Na Galipedia, a wikipedia en galego.
A Real Filharmonía de Galicia estreouse o 29 febreiro de 1996 cun concerto dirixido polo mestre Helmuth Rilling. Desde o 1 de xaneiro de 2001, a dirección titular corresponde ao mestre Antoni Ros Marbá, contando con Maximino Zumalave como principal director invitado.
Detrás da creación da RFG puxéronse os alicerces para o seu sostemento por medio da creación da Escola de Altos Estudos Musicais de Galicia, a través dun convenio entre a Consellería de Cultura da Xunta de Galicia e o Concello de Santiago. Unha parte importante do profesorado da Escola é ao mesmo tempo membro da orquestra e esta desenvolve funcións de aprendizaxe para os alumnos nas actividades de práctica orquestral e cobre igualmente as de divulgación musical para público, estudantes e profesores de música. A colaboración entre ambas as institucións quedou patente a temporada pasada na interpretación da 8a sinfonía de Bruckner, onde estiveron sobre o escenario 90 músicos. Co seu traballo cotián segue enriquecendo o seu variado repertorio, que vai de Bach á actualidade, asumindo plenamente a súa responsabilidade de dar saída a obras de compositores galegos, de varios dos cales protagonizou estreas absolutas.
Unha das citas ineludíbeis en cada temporada é a súa participación nos concertos didácticos para escolares que se ofrecen aos centros de ensino de toda Galicia. A titularidade da Real Filharmonía de Galicia recae na Xunta de Galicia, é xestionada polo Consorcio de Santiago e ten a súa sede permanente no Auditorio de Galicia, onde celebra os seus concertos de outubro a xuño.
Lonxe de ser unha orquestra con vocación localista, a RFG (membro da AEOS) ábrese a toda a comunidade galega e desde aquí a todo o ámbito estatal e internacional, do que é boa mostra a súa intervención no Festival Internacional de Piano de la Roque d’Anthéron (Francia), en Bilbao interpretando o Don Giovanni de Mozart, en León O Mesías de Haendel e os desprazamentos que ten previstos para esta temporada a Madrid e Barcelona, entre outras cidades.