Forza forte
Na Galipedia, a wikipedia en galego.
A Forza nuclear forte é un dos catro tipos de forza fundamentais que o modelo estándar da Física establece para explica-lo Universo.
Os efectos desta forza só se aprecian a distancias moi pequenas, (da orde de 1 fm), o tamaño dos núcleos atómicos, e non se ven para distancias maiores a 10-15 m. É a forza que mantén unidos ós nucleóns (partículas nucleares, protón e neutrón) no núcleo atómico, a pesares da repulsión electromagnética entre partículas cargadas do mesmo signo.
Na actualidade, a teoría da cromodinámica cuántica (QCD) explica as interaccións fortes entre partículas nucleares en termos da "forza de cor" entre quarks e antiquarks (as partículas constituíntes dos protóns e neutróns). Aos quarks e antiquarks, amais de carga eléctrica, asígnaselles unha característica nova, a "carga de cor" e a interacción forte entre eles transmítese a través doutras partículas, os gluóns. Estes son electricamente neutros, aínda que tamén teñen "carga de cor" e por iso tamén están sometidos á forza forte.
A forza entre partículas con carga de cor é moi forte, moito máis cá electromagnética. A forza que mantén unidos ós protóns e neutróns no núcleo é a forza residual entre os quarks e os gluóns que compoñen ditas partículas (vén ser un efecto paralelo ao das forzas de ligamento entre átomos para formar moléculas fronte á interacción eléctrica entre as cargas eléctricas que os forman: protóns e electróns, pero a súa natureza é moi diferente). Anteriormente críase que esta forza residual era a forza forte, mais agora asúmese que a forza de cor entre quarks é a fundamental (De xeito semellante as forzas interatómicas son un reflexo da forza electromagnética entre cargas que é a fundamental) .
Esta interacción é a que fai que nos núcleos dun átomo, os protóns se manteñan uns xunto ós outros aínda que teñan a mesma carga (positiva). Os protóns non teñen carga de cor, senon que son os quarks dos que están formados (up e down) os que a teñen (e a carga de cor entre os quarks dun protón e doutro dá lugar á forza que os xunta).
Os gluóns son as partículas portadoras da forza nuclear forte, que manteñen unidos os quarks para compoñer outras partículas: protóns, neutróns... Os gluóns tamén teñen carga de cor e polo tanto poden interaccionar entre si. Un reflexo disto pódese ver nas agrupacións de gluóns (glubolas).