Eletricitât
De Vichipedie, la enciclopedie libare dute in marilenghe.
La eletricitât e je une propietât de materie che ven fûr de presince o dal moviment di cjariis eletrichis. Insieme cul magnetisim, e costituìs l'interazion fondamentâl clamade eletromagnetisim. La eletricitât e je la responsabile di un grum di fenomens fisics, come lamps, corintis eletrichis e cjamps eletrics e e ven doprade di industriis impuartantis come chês de eletroniche e de lûs.
[cambie] Concets de eletricitât
Tal ûs di ogni dì, la peraule eletricitât e je aplicade a diviersis robis, che si puedin identificâ cun tiermins plui precîs:
- Cjarie eletriche - une propietât fondamentâl di cierts gjenars di parteselis subatomichis, che determine lis lôr interazions eletromagnetichis. La materie cjariade e je influençade di e prodûs cjamps eletromagnetics.
- Cjamp eletric - un efiet produsût di une cjarie eletriche che esercite une fuarce sui ogjets cjariâts intes sôs vicinancis
- Potenziâl eletric - la energjie potenziâl par unitât di cjarie, associade cuntun cjamp eletric static (dispès clamât voltaç)
- Corint eletriche - il moviment o flus di parteselis cjariadis eletrichementri.
- Energjie eletriche - la energjie rindude disponibil dal flus di cjarie eletriche traviers di un condutôr o da lis fuarcis tra lis parteselis cjariadis.
- Potence eletriche - il tas cun cui la energjie eletriche e ven convertide in o di une altre forme di energjie, come lûs, calôr, o energjie mecaniche.
[cambie] Storie
Di ce che podin lei intes oparis di Talete di Mileto, ator dal 6000 p.d.C., inte antiche Grecie si saveve che se si strussave dal pêl su superficiis come par esempli la ambre, si creave une atrazion tra i doi cuarps. La peraule eletricitât e fo cugnade dal sienciât inglês William Gilbert, di ηλεκτρον (elektron), che in grêc antîc al voleve dî ambre. Ma lis grandis discuviertis in cheste cjamp vignirin fûr tra il 1700 e il 1800: tal 1752 Beniamin Franklin, cul famôs esperiment dal acuilon, al discuvierzè la relazion tra lamps e eletricitât. Al inizi dal 1800 invezit André-Marie Ampère e Hans Christian Ørsted discuvierzerin la relazion tra eletricitât e magnetisim, che fo fondamentâl par dutis lis evoluzion sucessivis.
[cambie] Unitâts di misure leadis a la eletricitât
| Simbul | Grandece fisiche | Unitât derivade | In unitâts fondamentâls dal SI | |
|---|---|---|---|---|
| I | Corint eletriche | Ampere (unitât fondamentâl) | A | A |
| q | Cjarie eletriche (o cuantitât di eletricitât) | Coulomb | C | A·s |
| V | Potenziâl eletric | Volt | V | J/C = kg·m2·s−3·A−1 |
| R | Resistence | Ohm | Ω | V/A = kg·m2·s−3·A−2 |
| P | Potence eletriche | Watt | W | V·A = kg·m2·s−3 |
| C | Capacitât eletriche | Farad | F | C/V = kg−1·m−2·A2·s4 |
| ε | Permetivitât | Farad par metri | F/m | kg−1·m−3·A2·s4 |
| χe | Suscetibilitât eletriche | adimensionâl | ||
| G, Y, B | Conducibilitât eletriche, ametence e reatance | Siemens | S | Ω−1 = kg−1·m−2·s3·A2 |
| σ | Condutivitât | Siemens par metri | S/m | kg−1·m−3·s3·A2 |
| H | Intensitât dal cjamp magnetic | Ampere par metri | A/m | A·m−1 |
| Φm | Flus magnetic | Weber | Wb | V·s = kg·m2·s−2·A−1 |
| B | Densitât dal cjamp magnetic, induzion magnetiche e fuarce dal cjamp magnetic | Tesla | T | Wb/m2 = kg·s−2·A−1 |
| Rilutance magnetiche | Ampere par weber | A/Wb | kg−1·m−2·s2·A2 | |
| L | Indutance | Henry | H | Wb/A = V·s/A = kg·m2·s−2·A−2 |
| μ | Permeabilitât | Henry par metri | H/m | kg·m·s−2·A−2 |
| χm | Suscetibilitât magnetiche | adimensionâl |
