Aquilee
De Vichipedie, la enciclopedie libare dute in marilenghe.
Aquilee | |
![]() |
|
Non ufiziâl par talian | Aquileia |
Provincie | Udin |
Part | Basse orientâl |
Altitudin | 5 m s.n.m |
Superficie | 36 km² |
Popolazion | 3330 ab. |
Densitât | 93 ab/km² |
Frazions | Viola, Biligne, Munastîr, Bielvedê |
Comuns confinants | Flumisel, Grau, Tierç, Vile Visintine |
CAP | 33050 |
Prefìs telefonic | 0431 |
Patron | Sants Ermagore e Fortunât |
Sît istituzionâl | |
Cjale il Progjet comuns | |
Aquilee (loc. Aquilea oben Niculea, in furlan antîc Olee) e je al dì di vuê un paîs de Basse a pôcs chilometris di Çarvignan e a cirche 30 di Udin. La date di fondazion storiche de citât romane e je il 181 p.d.C, ma recents sgjâfs archeologjics e àn puartât ae lûs un insediament une vore plui antîc: IX secul p.d.C.. Al storic Tito Livio al conte di un oppidum celtic disdrumât jù dal soldâts romans che vignirin a ocupâ chest teritori.
Si sa di sigûr che ancjemò prime dai romans Aquilee (il cui non i ultins studis etimologjics lu fasin derivâ di une nominace retiche-etrusche) a jere un centri economic-comerciâl e ancje religjôs, par vie de sô ubicazion gjeografiche daprûf dal mâr Adriatic e duncje tocjade dalis antighis stradis europeanis de ambre e dal sâl. Tal timp dai Romans al è stât il centri plui impuartant de Italie setentrionâl (al samee che e fos la cuarte citât dal empîr daspò Rome). In chê volte e jere traviersade dal Nadison e de Tor (vuê dome dal piçul Natisse), che e formarin il grant puart fluviâl roman larc 50 metris e lunc plui di 300 e che colegavin Aquilee al mâr (dulà che je Grau).
Chestis aghis e vignerin a mancjà di bot e sclop te seconde metât dal IV secul: par vie di motîfs naturâi o forsit a cause di un assedi. Dome te Etât di mieç il puart aquileiês al vignarà a cjapâ di gnûf vigôr.
Cu lis invasions barbarichis Aquilee e piert la sô grande influence economiche e militâr e tante int scomence a puartâsi bande la marine adriatiche come Grau o Vignesie. Ma Aquilee e torne a rinassi cule etât di mieç, cuant che l'imperadôr Carli il Grant al scomence a regalâ al Patriarcje di Aquilee terens e dirits in cambi di sosten politic e militâr.
Al nas cussì il Patriarcjât di Aquilee che controlave dut il Friûl ma ancje tocs de Slovenie, dal Venit e de Istrie. Di chest e reste il ricuart inte Basiliche, plui voltis comedade (par vie di taramots, invasions e cussì dilunc) seont il stîl in voghe: romanic e podopo gotic. La fin de Patrie dal Friûl e fo decretade militarmentri de Serenissime che invadè il teritori patriarcjâl tal 1421.
Tal 1756 e vignì ancje decretade la fin de Diocesi di Aquilee, burint fûr chê di Udin pal teritori furlan sot Vignesie e chê di Gurize pes comunitâts furlanis jenfri l'Austrie. Aquilee cul tratât di Worms dal 1508 e, fintremai, la prime vuere mondiâl e fo simpri teritori furlan sot da l'Austrie.
Aquilee in dì di vuê a je cognossude in dut il mont pai notevui rescj archeologjics discuvierts e pe bielece de basiliche, dulà che un intîr paviment mosaicât tal IV secul par merit dal vescul cristian Teodorus al fâs gjoldi ducj i visitadôrs. Chescj mosaics a rapresentin il percors religjôs dal cristian (vite muart e resurezion) e di fat la ultime part di chest grant capolavôr fat di simbui, personaçs e rapresentazions dut in mosaic colorât al conte dal viaç di Jone che al ven butât a mâr, inglutît dal drâc marin e podopo rispudât fûr sul lît.
[cambie] Cjale ancje
- Liste dai Patriarcjis di Aquilee