Paugnat sa Kusog

Gikan sa Wikipedia, ang gawasnong ensayklopedya

Kining maong panid usa ka saha. Tabangi ang Wikipedya pinaagi sa pag-usab niini!

Ang Mga Kahuyangan Sa Talk ‘N Text

Ni Richel G. Dorotan

IGO ra gyod tawong nakauno ang Talk ‘N Text Phonepals batok sa power-packed San Miguel Beermen sa ilang best-of-seven championship series. Makalingaw ang ilang titular showdown sanglit managsamang uhaw sa kampeyonato ang duha ka team. Hinuon, ang titulong nalangkat sa Beermen ika-17 na sa ilang prangkisa. Pero sulod usab sa upat ka tuig, karon pa sila makabalik og langkat sa kampeyonato. Ang Phonepals usab ingon sa kanunay lang magtuhik-tuhik tungod kay ikatulo na nila kining Finals appearance sulod sa unom ka komperensiya. Managsama silang uhaw. Daghan ang nagtuo nga ang sunod nga motukod og dinastiya sa PBA mao ang Talk ‘N Text tungod kay anaa nila ang mga materyales sa usa ka championship caliber team. Anaa nila ang usa sa labing kilas nga point guard nga si Jimmy Alapag nga nagbaton og talagsaong abilidad sa pagpasa sa bola. Anaa usab kanila ang labing dominanteng sentro nga si Paul Asi Taulava. Anaa kanila si Willie Miller nga kanunayng unpredictable ang dinuwaan ug lisod kaayong bantayan. Anaa kanila si Mark Telan, Yancy de Ocampo, Don Camaso, Harvey Carey ug uban pang second stringer nga pulos mga batan-on. Apan unsa may naingnan nga gipilde man sila sa San Miguel Beermen bisan pa sa bentaha nga anaa kanila? Ang akong nakita mao ang Taulava-Miller-Alapag factor. Silang tulo ang missing link sa kadena sa opensa sa Talk ‘N Text. Kon dili motrabaho ang Taulava-Miller-Alapag tandem, disorganisado gayod ang Phonepals. Nabantog sila sa run-and-gun offense. Sa ato pa, offense oriented gayod ang Phonepals. Kon makontrol lang sa kontra ang tempo sa duwa— nga mao gayoy gihimo sa Beermen— segurado nga maguba gayod ang ilang opensa. Kining mga basketbolistaha gusto kaayong modagan nga di na magpaabot nga maorganisar ang depensa sa kontra. Ingon sa napusgay ang pagka bato ni Paul Asi “The Rock” Taulava human sa siyam ka buwan niyang layoff tungod sa kuwestiyonable niyang mga papeles. Unya dihang nakabalik siya sa korte, Finals na. Unsaon pa man niya pag-adjust sa duwa diin ang matag segundo nimo sa korte mahinungdanon kaayo? Unya natakilpo pa gyod siya nga maoy hinungdan nga dili sento porsento ang iyang dinulaan. Samot na. “This series hurt Asi’s confidence. He was repentant all the time, saying sorry,” matod ni Phonepals Coach Joel Banal sa website sa PBA. “What happened to him is good and bad. It’s good if he comes back from this and bad if he doesn’t.” Ang dagayday sa opensa sa Phonepals niadtong wala pa mahibalik si Asi labihan ka-fluid. Si Alapag ang nagkupot sa manibela samtang ang ilang import nga si Gerald Honeycutt maoy maghimog dakong danyos didto sa shaded area. Mahimong pundokon ni Alapag sa sentro ang tanang mga defenders aron mo-collapse niya og dayon i-kick out ang bola ngadto kang Miller o kaha kang Telan diin hait kaayo sa perimeter. Mahimo pod nga paaboton lang ni Honeycutt ang double team kon mag-lowpost play sila unya pangitaon ang malibre niyang teammate. Ingon ana kadaghan ang ilang option. Perpekto na kaayo ang ilang rotation kay ang maong kombinasyon mao untay armas nga moguba sa ngilngig nga zone defense sa Beermen. Apan unsaon nga angay man gyong iapil si Asi sa offensive option kay dugay ra god nilang gihandom ang iyang pagbalik. Ang problema lang kay wala na mohaom si Asi sa sistema nga gi-work out ni Coach Banal. Wala kaayo mo-jell si Asi sa texture sa ilang duwa. Kini ang sipyat… dakong sipyat ni Coach Banal. Unta, gihimo lang niyang decoy si Asi aron maparalisar pod si Dorian Peña, Danny I., ug Nick Belasco. Ang mahitabo unta nga way kapuslanan ang pagbantay ni Dorian, Danny ug Nick kang Asi kay dili man diay kini offensive threat. Tiaw mo, tulo unta ka magduduwa sa San Miguel ang magbantay sa magduduwa nga di diay motira! Ug ang nakaayo sa maong estratehiya, maguba usab unta ang opensa ning tulo ka player nga akong ginganlan. Sa chess pa, queenless man tuod pero nakaon pod ang duha ka rook ug usa ka bishop sa kontra. Sa ato pa, di alkanse. Bisan tuod og dominante si Asi kaniadto apan ang dugay-dugay niyang palta sa duwa nakapahimo kaniyang apyogon. Nabantayan ko usab nga kanunay siyang kaposon sa hangin. Ang nahitabo nga kanunay lang banggaon si Asi Taulava ni Dorian Peña. Kaniadto, bisan pag pila ka Dorian Peña ang mo-body kang Taulava kuwang ra kining kilawon sa naulahi, pabakraydon pa nang uban. Pero niadtong PBA Finals nga nadesisyonan lang sulod sa lima ka duwa, si “The Rock” kuwang rang gi-jackhammer ni Peña. Both ends of the court, sa opensa ug depensa, dili na gyod factor si Asi. Hinay kaayo ang iyang reaksiyon sa maayong footwork ni Danny Ildefonso, ang napiling Finals MVP. Mabiyaan siya kanunay hinungdan nga sayo siyang ma-foul trouble. Laing problema nga wa masulbad ni Coach Banal mao ang Cebuano hotshot nga si Dondon Hontiveros. Gikataw-an lang silang Dondon. Si Dondon maoy matang sa clutch shooter nga di nimo puydeng biyaan sa three point area. Hatagig benta di ba tirahan kas atubangan. Ug ang nakalisod kay kon mag-init na gani ang iyang pulso, mahimo niya kining himoong back-to-back-to-back. Usa siya ka streak shooter. Ang mga tirada ni Dondon nakaguba sa mga bomba nga ihulog unta sa Phonepals. Magsugod na unta silag sakay sa bukubuko sa momentum. Apan mokalit lag tumaw si Dondon gikan sa kilid sa iyang tirada nga pangpatay sa sunog nga duslitan unta sa Phonepals. Si Dondon Hontiveros (ug si James Yap) maoy nakita kong labing artistikong motirahayg tres sa PBA. Nindot kaayong tan-awon ang iyang fake, ang abaga, ang ritmo sa tiil nga makalipat sa bantay, ang porma sa kamot human ika-release ang bola. Matod pa sa akong amigo, pangposter kunog pinormahan. Dili lang three point shooting ang armory ni Dondon: he can also run the breaks and attack weak zones. Finger roll, floater, ug baseline attack maoy pipila lang sa iyang abilidad sa korte. Kuyaw ning tawhana. Gani, siya ang nakakuha sa Sportsmanship Award. Ang pangutana: duna ba goy mibantay kang Dondon? Wala! Napakyas sab si Miller sa pagpakita sa iyang numero. Sa elimination round, mikamada siyag 28.4% sa 3-point range, 6.4 rebounds, 3.4 assists nga igo na kaayong pasaporte nga ituboy siya isip Best Player of the Conference. Apan sa lima ka duwa sa Finals nag-average lang siyag 30 % sa field. Lagmit, gisabalan siya sa iyang maskara apan wa siyay mahimo kay may injury ang iyang ilong. Usahay di niya makita ang bola ilabi nag mahiwi ang iyang protective facemask. Si Honeycutt usab midaus-os ngadto na lang sa 19.6 ppg (points per game) sa Finals gikan sa 23.8 ppg. Ug kay gikontrol man sa SMB ang tempo mimenos usab ang produksiyon ni Jimmy Alapag ngadto na lang sa 9.6 ppg gikan sa iyang 14.6 ppg. Si Mark Telan nanaog usab ngadto sa 8.2 ppg gikan sa iyang 12.5 ppg. Ang nabantog nga offensive team nga Phonepals sa ilang 94 points average per game giposasan sa Beermen ngadto na lang sa 83 points average per game. Ug kini ang uyok sa kaparotan sa Talk ‘N Text. Makaingon kita nga ang Beermen naghimo sa ilang homework. Saludo ko ni SMB Coach Joseph Uychico. Sa sunod nga komperensiya, gipaabot nato ang mas bangis pa nga Talk ‘n Text Phonepals tungod sa ilang kasinatian sa duwa. Nakaseguro ko nga sa ilang pagbalik, ang mga sipyat nila ila nang makorehian. Si Coach Banal maoy matang sa coach nga bukas kanunay sa mga komentaryo. Hibaw-i usab nga tulo sa lima ka duwa sa ilang Finals showdown gidesisyonan lamang sa dramatikong endgame. Gamay ra gyod kaayog ligas. Ug kay mas nakabentaha man ang SMB sa kasinatian, kay tiaw bay ika-17 na to nilang titulo, natural nga maka-handle gyod sila sa pressure sa dula. Better luck next time, Asi.--

[usba] SUGBUANONG MGA PANID SA INTERNET

Retrieved from "http://ceb.wikipedia.org../../../p/a/u/Paugnat_sa_Kusog_b4be.html"

We provide Linux to the World

Paugnat sa Kusog

Gikan sa Wikipedia, ang gawasnong ensayklopedya

[usba] SUGBUANONG MGA PANID SA INTERNET

Views

Tabok-tabok

Pangita