Руслана

Зьвесткі зь Вікіпэдыі — вольнай энцыкляпэдыі.

Руслана. Фота У. Каткоўскага. 2004

Русла́на Лыжы́чка (па-ўкраінску Русла́на Лижи́чко) (нарадзілася 24 траўня 1973) — вядомая ўкраінская сьпявачка, танцорка і прадусэрка.

У 2004 годзе Руслана перамагла гран-пры ў конкурсе Эўрабачаньне зь песьняй "Wild Dances". За год да гэтага яе альбом "Дикі танці" ва Ўкраіне быў прададзены накладам больш як 100,000 асобнікаў і стаў плацінавым.

[рэдагаваць] Біяграфія

Руслана нарадзілася і гадавалася ў Львове. Яшчэ дзіцём сьпявала ў гурце "Орион", а потым у дзіцячым ансамблі "Усмішка". Скончыла музычную вучэльню і паступіла на дырыжорскі факультэт Львовскай кансэрваторыі. Прафэсіянальна грае на фортэпіяна.

У 1993 Руслана і Аляксандар Ксэнафонтаў (з кім яна пабралася шлюбам праз два гады) асноўваюць рэклямную студыю "Люксен". Руслана агучвае шматлікія радыёрэклямы, у тым ліку фірмаў Oriflame i Coca-Cola.

У сярэдзіне 90-х бярэ ўдзел у некалькіх музычных праектах, перамагае на ўкраінскіх песенных конкурсах.

У 1998 годзе Руслана выдае свой першы альбом "Мить весни" (Хвіля вясны), які набывае папулярнасьць.

У 1999 годзе Руслана ўдзельнічае ў запісу каляднага мюзіклу "Останнє Рiздво 90-x" (Апошнія каляды 90-х), які атрымвае ўзнагароду "Фільм году" ва Ўкраіне.

У 2003 годзе ейны альбом "Дикі танці" ва Ўкраіне становіцца плацінавым — было прададзена больш як 100,000 асобнікаў.

16 траўня 2004 году Руслана перамагае гран-пры ў музычным конкурсе Эўрабачаньне, які праходзіў у Стамбулі, Турэччына, зь песьняй "Wild Dances".